Раўнд 3: Spotify скарачае 1500 супрацоўнікаў

Гэта ўжо трэці раўнд звальненняў у шведскай кампаніі за год, адзначае Reuters. У студзені «пад нож» пайшлі 600 супрацоўнікаў, а яшчэ 200 — у чэрвені.

Заснавальнік і гендырэктар Spotify Даніэль Эк у лісце да падначаленых адзначыў, што кампанія магла дазволіць сабе наймаць больш у 2020–2021 гадах, калі капітал быў таннейшы, што шмат у чым спрыяла росту прадукцыйнасці. Spotify уклаў больш за мільярд долараў у кірунак падкастаў і прыцягненне знакамітасцяў, а таксама ў пашырэнне прысутнасці ў розных краінах.

Трэці квартал кампанія ўпершыню з 2021 года завяршыла ў плюсе дзякуючы росту колькасці падпісчыкаў ва ўсіх рэгіёнах і падаражанню тарыфаў. Па выніках квартала штомесячная актыўная аўдыторыя сэрвісу налічвала 574 млн карыстальнікаў — супраць 345 млн пры канцы 2020-га.

Аднак, паводле слоў Эка, па большасці метрык кампанія выявілася больш прадукцыйнай, але менш эфектыўнай, а ёй трэба і тое, і другое.

Супрацоўнікаў, якіх закране звальненне, пачнуць апавяшчаць сёння. Ім выплацяць аклады прыкладна за пяць месяцаў, пакрыюць медстрахоўку на гэты тэрмін і кампенсуюць адпачынак. Таксама абяцаюць дапамагчы супрацоўнікам, у якіх ад працаўладкавання залежыць міграцыйны статус.