У Мінску злачынцы катавалі айцішніка і патрабавалі аддаць крыпту на мільярд рублёў

45-гадовы праграміст знаходзіўся дома, калі ў дзверы пазванілі двое мужчын у спецадзенні. Яны заявілі, што хочуць праверыць лічыльнікі. Але, трапіўшы ў кватэру, «электрыкі» надзелі на гаспадара кайданкі і пачалі патрабаваць, каб той аддаў ім крыптавалюту. Сума, якая называецца ў паведамленні СК, — больш за мільярд рублёў.

Нападнікі пагражалі айцішніку «пісталетам і электрашокерам, а таксама ін’екцыяй наркатычных рэчываў».

— Больш за гадзіну мужчыны катавалі гаспадара кватэры, але, так і не дабіўшыся жаданага, далі пацярпеламу 24 гадзіны, каб той перавёў крыптавалюту на іх электронны гаманец. Пасля гэтага яны зніклі, забраўшы мабільны тэлефон пацярпелага, каб ён не змог звярнуцца ў праваахоўныя органы.

У матэрыяле апускаюцца далейшыя падрабязнасці. Указваецца толькі, што па дадзеным факце была распачатая крымінальная справа. У ходзе следства высветлілася, што на рахунках пацярпелага сапраўды была крыптавалюта — аднак не ў такой суме, якую патрабавалі фігуранты.

Далей следчыя высветлілі, што рабаванне мінчука было замоўлена. «Злачынства старанна планавалася некалькі месяцаў: канспірацыя, меры перасцярогі і шляхі адступлення. У ходзе аператыўна-вышуковых мерапрыемстваў удалося ўсталяваць асобы выканаўцаў заказнога нападу, імі аказаліся грамадзяне Беларусі 56 і 57 гадоў, адзін з іх — з крымінальным мінулым», — гаворыцца ў паведамленні.

Адзін з нападнікаў быў затрыманы. Ён прызнаўся ў здзейсненым, паказаў месца, дзе яны з другім фігурантам выкінулі зброю. Следчыя прыцягнулі вадалазаў, і тыя знайшлі пнеўматычны пісталет з глушыльнікам і кайданкі.

Па падставе сабраных доказаў 56-гадоваму мужчыну было прад’яўлена абвінавачанне па наступных артыкулах КК РБ:

• ч. 3 арт. 207 (разбой, здзейснены групай асоб з мэтай завалодання маёмасцю ў асабліва буйным памеры);
• ч. 3 арт. 208 (вымагальніцтва, здзейсненае з мэтай атрымання маёмаснай выгады ў асабліва буйным памеры).

Максімальнае пакаранне па абедзвюх артыкулах — 15 гадоў пазбаўлення волі.

Другі фігурант на дадзены момант хаваецца за мяжой. Следчыя высветлілі, што ўжо на наступны дзень мужчына на папутках перасек мяжу Беларусі і з’ехаў у Польшчу. Яму завочна прад’яўлена абвінавачанне па тых жа артыкулах КК РБ з мерай стрымання ў выглядзе заключэння пад варту. Ён абвешчаны ў міжнародны вышук.

Цікава, што ў кватэры пацярпелага была буйная сума грошай і дарагая маёмасць, «аднак фігуранты патрабавалі ў жыхара сталіцы менавіта крыптаактывы».

У матэрыяле СК паведамляецца, што зараз следчыя вывучаюць атачэнне пацярпелага і яго дзелавыя сувязі, каб далей расплесці клубок. «У дачыненні да астатніх фігурантаў крымінальная справа выдзелена ў асобную вытворчасць».