Мадэратары r/opensource на Reddit забаранілі ШІ-праекты і абмежавалі ўдзел распрацоўшчыкаў-адзіночак і карыстальнікаў, якія не валодаюць англійскай. Новыя правілы выклікалі абурэнне супольнасці.
Мадэратары r/opensource на Reddit забаранілі ШІ-праекты і абмежавалі ўдзел распрацоўшчыкаў-адзіночак і карыстальнікаў, якія не валодаюць англійскай. Новыя правілы выклікалі абурэнне супольнасці.
24 кастрычніка мадэратар пад нікам Wolvereness апублікаваў новыя правілы пад загалоўкам «Вашыя токены нічога не каштуюць: больш ніякага ШІ». «Калі ваш праект выкарыстоўвае ШІ, створаны з дапамогай ШІ або прызначаны для ШІ, яму не месца ў r/opensource. Штучны інтэлект у яго цяперашнім выглядзе несумяшчальны з нашай супольнасцю адкрытага ПЗ», — гаворыцца ў аб’яве.
Прычым абмежаванні закранулі не толькі нейрасеткі. Цяпер для публікацыі праект павінен існаваць не менш за год, актыўна развівацца і мець некалькіх удзельнікаў — арыенціровачна ад трох. У яго таксама павінна быць уласная супольнасць.
Гэта фактычна закрывае магчымасць прадставіць сваю распрацоўку праграмістам-адзіночкам і аўтарам новых праектаў. Мадэратары таксама перастануць прымаць аб’явы з пошукам удзельнікаў і суправаджальнікаў для адкрытага ПЗ.
Асобнае правіла датычыць мовы зносінаў. «Калі вы не размаўляеце па-ангельску, вам трэба знайсці іншую супольнасць. Мы не можам адрозніць тэкст, напісаны ШІ, ад тэксту, перакладзенага ШІ. А паколькі вы не ведаеце англійскай, то нават самі не зможаце праверыць правільнасць перакладу», — растлумачылі мадэратары.
Рашэнне выклікала абурэнне карыстальнікаў. Многія лічаць, што новыя правілы супярэчаць самой ідэі адкрытага ПЗ, якая мяркуе свабодны ўдзел распрацоўшчыкаў.
«Можна не любіць ШІ, але гэта ніяк не мяняе таго, ці з’яўляецца праграмнае забеспячэнне адкрытым. Атрымліваецца, Linux цяпер таксама забаронены?» — напісаў адзін з удзельнікаў абмеркавання.
Карыстальнікі нагадалі, што Лінус Торвальдс ужо выкарыстоўвае ШІ пры распрацоўцы ядра Linux, таму літаральнае прымяненне новых правілаў магло б закрануць нават гэты праект.
Іншы ўдзельнік расказаў, што падтрымлівае сваю распрацоўку дзевяць гадоў, сабраў больш за 300 зорак на GitHub і наогул не выкарыстоўвае ШІ. Аднак цяпер ягоны праект не адпавядае патрабаванням, паколькі ён адзіны распрацоўшчык.
У адказ на крытыку Wolvereness удакладніў, што правілы не будуць прымяняцца абсалютна да ўсіх выпадкаў. Напрыклад, выключэнні могуць зрабіць для праграм, у якіх ШІ выкарыстоўваецца толькі для асобных дапаможных функцый, такіх як аўтаматычнае стварэнне субтытраў.
Але гэта не спыніла незадаволенасць. Некаторыя ўдзельнікі скардзіліся на блакіроўкі за крытыку мадэратараў, а іншыя стварылі альтэрнатыўную супольнасць r/TrueOpenSource. З жорсткасцю новых абмежаванняў не пагадзіўся нават адзін з мадэратараў r/opensource. Паводле яго, пра змены ён даведаўся з апавяшчэнняў пра мадэрацыю, а не падчас папярэдняга абмеркавання.
Релоцировались? Теперь вы можете комментировать без верификации аккаунта.