Па заробку — №1, але ён амаль не расце. Як маецца ІТ на фоне іншых галін

Заробак

Сярэдні заробак — 1 месца

На працягу апошніх гадоў ІТ-сектар — лідар па ўзроўні сярэдняга заробку. Нічога не змянілася і сёлета.

Паводле звестак афіцыйнай статыстыкі, за студзень–верасень гэтага года сярэдні заробак у ІТ перавысіў 6,6 тысячы рублёў. Для параўнання: найбліжэйшы пераследнік — паветраны транспарт— адстаў ад ІТ больш як на 2 тысячы рублёў.

Тэмп росту заробку — 80 месца

А вось па тэмпе росту заробку айцішнікі апынулася фактычна на дне. За дзевяць месяцаў гэтага года сярэдні заробак у ІТ вырас адносна студзеня-верасня мінулага года ўсяго на 36,5 рублёў або на 0,06%. І гэта ўжо з улікам росту курса асноўных валют (долара і еўра), да якіх прывязаныя заробкі многіх айцішнікаў. 

Для параўнання: у лідараў, работнікаў пасажырскага паветранага транспарту і вытворцаў вылічальнай тэхнікі/ электронікі, заробкі за гэты год выраслі больш як на 30%.

У рэйтынгу па росце заробку ІТ-сектар апынуўся па выніках студзеня-верасня на 80 месцы. Па выніках усяго мінулага года айцішнікі былі вышэй — бліжэй да 50 месца.

Фінансавыя паказчыкі 

Выручка — 8 месца

У 2021 і 2022 гадах сектар «інфармацыя і сувязь» займаў 7 месца па памеры выручкі сярод асноўных відаў дзейнасці. Сёлета ён апусціўся на 8 месца, прапусціўшы наперад будаўнікоў. 

За студзень–жнівень ІТ-кампаніі разам з сувяззю атрымалі каля 7,8 млрд рублёў выручкі — на 6% менш, ніж за такі ж перыяд 2020 года. Пры гэтым «інфармацыя і сувязь» — адзіны від дзейнасці, дзе выручка сёлета выйшла меншай, ніж летась.

Рэнтабельнасць — 4 месца

Упершыню за апошнія некалькі гадоў сектар «інфармацыя і сувязь» выпаў з топ-3 самых эфектыўных у беларускай эканоміцы. Па выніках 8 месяцаў рэнтабельнасць продажаў у ІТ і сувязі ўпала да 17,9% (у студзені–жніўні 2022 было 18,8%). Сярод топ-5 самых эфектыўных відаў дзейнасці рэнтабельнасць знізілася толькі ў «інфармацыі і сувязі».

Белстат не дае падрабязнай статыстыкі па рэнтабельнасці продажаў беспасярэдне ў ІТ-сектары. Але мы знайшлі гадавыя даныя. 2022 год стаў для ІТ найгоршым за апошнія 7 гадоў.

Чысты прыбытак — 4 месца 

За восем месяцаў гэтага года кампаніі «інфармацыі і сувязі» атрымалі больш за 1,1 мільярда рублёў чыстага прыбытку. Па гэтым паказчыку сектар на 4 месцы сярод асноўных відаў дзейнасці. Пры гэтым адносна такога ж перыяду мінулага года чысты прыбытак вырас на 17%.

Але, з усяго відаць, чысты прыбытак расце ў асноўным за кошт прадпрыемстваў сувязі. Бо беспасярэдне ў ІТ-сектары чысты прыбытак падае, калі меркаваць па гадавых даных Белстата (ведамства не публікуе падрабязнейшай інфармацыі пра фінансы беспасярэдне ў ІТ). Так, за мінулы год чысты прыбытак ІТ-кампаній упаў на 30%. 

Спецыялісты

Найманне супрацоўнікаў — 20 месца 

ІТ-кампаніі ў Беларусі нанялі за восем месяцаў гэтага года каля 6,4 тысячы новых супрацоўнікаў. У параўнанні з такім жа перыядам мінулага года найманне ўпала на 30%.

Па колькасці працаўладкаваных спецыялістаў ІТ апынуўся ўсяго толькі на 20 месцы сярод усіх відаў дзейнасці. Для параўнання: па выніках 2021 года ІТ-сектар быў у рэйтынгу наймання на 9 месцы, летась — на 13 месцы.

Колькасць звольненых супрацоўнікаў — 12 месца

Сёлета ІТ-кампаніі ўжо звольнілі больш за 11 тысяч супрацоўнікаў. Гэта амаль удвая менш у параўнанні са студзенем-жніўнем мінулага года. Тым не менш па колькасці звольненых спецыялістаў ІТ у рэйтынгу досыць высока — на 12 месцы сярод усіх відаў дзейнасці. На такім жа месцы ІТ-сектар быў і ў 2021 годзе. А летась ІТ-кампаніі і зусім трапілі ў топ-10 (8 месца).

Адток супрацоўнікаў — 4 месца

За восем месяцаў гэтага года ІТ-сектар страціў, паводле нашых ацэнак, амаль 5 тысяч спецыялістаў і заняў па гэтым паказчыку 4 месца сярод усіх відаў дзейнасці. Сітуацыя з адтокам кадраў сёлета горшая толькі ў адукацыі, рознічным гандлі і энергетыцы.

Затое летась менавіта ІТ-сектар быў лідарам па чыстым адтоку спецыялістаў (розніца паміж прынятымі і звольненымі) сярод усіх відаў дзейнасці. За 2022 год галіна страціла 17 тысяч чалавек. 

Супрацьлеглая сітуацыя была ў 2021 годзе. Тады, наадварот, глабальны штат ІТ-кампаній у Беларусі вырас на 2,5 тысячы чалавек. У выніку ІТ абышоў усе віды дзейнасці па чыстым прытоку спецыялістаў.

dev.by, як і іншым сумленным медыя, сёння вельмі складана: рэдакцыя працуе па-за межамі краіны, а нашыя рэкламныя даходы скараціліся ў некалькі разоў. Але мы даем рады — з вашай дапамогай. Гэта вы дзеліцеся з намі інфанагодамі, думкамі, досведам, часам, увагай і данатамі.

Праз Patreon. 

З Беларусі — праз Donorbox.

І яшчэ крыптой, тут кашалькі.

Дзякуй, што прачыталі гэтае паведамленне.