«Рэкрутар — гэта драпежнік». Супрацоўнікаў, якіх масава скарацілі, разбіраюць хутчэй, чым тых, хто сышоў сам?
Не паспела кампанія Blockchain Sports Ecosystem, якая не выплочвала супрацоўнікам зарплату некалькі месяцаў, абвясціць, што знайшла грошы і нават пагасіць частку запазычанасцей, — а каманду ўжо расцягнулі (па іх словах).
Абмеркавалі гэтую з’яву з вядомымі эйчарамі.
«Шукаць прыдатных людзей, перацягваць з кампаній, дзе ў іх усё добра, — складаней»
HR-дырэктар і бізнес-кансультант Ірына Вішнеўская кажа, што «кампаніі з праблемамі — гэта „не проста каштоўны мех“, але яшчэ і донар кадраў для рэкрутараў з арганізацый-канкурэнтаў, і так было заўсёды».
— Калі сітуацыя са скарачэннямі ўжо дастаткова вызначаная, то пажывіцца бягуць проста ўсе. У ідэале добры рэкрутар павінен даведацца пра праблемы і планаваныя змены яшчэ да таго, як пра гэта даведаюцца ўсе астатнія на рынку, і паспець першым.
Калі ты даведваешся, што ў кампаніі, блізкай да вас па віду дзейнасці, праблемы, першае, што ты робіш, — ідзеш у LinkedIn, уводзіш назву ў пошук і глядзіш, хто там цяпер працуе і каго ты можаш забраць досыць лёгка.
Ну гэта ж відавочна: шукаць прыдатных людзей, перацягваць з кампаній, дзе ў іх усё добра, — складаней, чым прыйсці да тых, хто ўжо раздумвае, выкласці сваё рэзюмэ ці пачакаць, а раптам у кампаніі ўсё наладзіцца.
Страхі, сумневы: «а раптам не наладзіцца, а мне ўжо за месяц зарплату затрымалі, хто гарантуе, што і далей не затрымаюць» — вось на гэтым досыць лёгка згуляць, таму што гэта базавыя пытанні бяспекі і выжывання. Нам патрэбныя грошы для таго, каб жыць.
Магчыма, цяпер з-за крызісу на ІТ-рынку гэтыя працэсы ідуць павольней, бо, на жаль, назіраецца дэфіцыт вакансій, — але яны ідуць. Проста таму што прасцей узяць зразумелых і правераных з патрэбнай кампаніі, чым праводзіць дзясяткі сумоўяў кандыдатаў з рынку.
Любы моцны рэкрутар — гэта драпежнік. І як драпежнікі, мы, вядома, атрымліваем асалоду ад добрага і паспяховага палявання і моцнае задавальненне ад закрыцця асабліва складаных пазіцый. Але ніхто не адмовіцца і хутка разарваць аслабелага канкурэнта, адхапіць свой кавалак і далей задаволена грэцца на сонейку (прабачце за такое параўнанне).
Уласна менавіта таму добры рэкрутар і павінен ведаць рынак, канкурэнтаў, мець крыніцы інфармацыі пра тое, што адбываецца ў кампаніях, і хутка арыентавацца ў зменах.
«Гэта просты спосаб трапіць на радар да рэкрутара, зацікаўленага ў канкрэтнай спецыялізацыі»
Заснавальніца рэкрутынгавага агенцтва Recrucial (у мінулым — HRD Viber і рэкрутар EPAM) Марынa Хоміч у адказ на пытанне журналіста devby адзначае, што «не назірала такой карэляцыі, тым больш у маштабе, які дазволіць зрабіць выснову».
— Магу сказаць: гэта праўда, што рэкрутары такое адсочваюць. Аднак тое, як хутка кандыдат знойдзе новую працу, у большай ступені залежыць ад таго, наколькі запатрабаваныя тэхналогіі, у якіх ён спецыялізуецца, — чым ад таго, як ён выйшаў на рынак.
Ускосна можна лічыць гэта такім чынам: паколькі выпадкі скарачэнняў ці праблем у кампаніі хутка робяцца публічным здабыткам, — гэта просты спосаб трапіць на радар да рэкрутара, зацікаўленага ў канкрэтнай спецыялізацыі.
Але калі кандыдат умее знаходзіць рэлевантныя (менавіта рэлевантныя) прапановы на рынку, для рэкрутара не будзе розніцы, якім чынам ён выйшаў на рынак пры ўмове, што няма нейкай папярэдняй гісторыі зносін з гэтым жа кандыдатам, якая магла б на гэта паўплываць.
Читать на dev.by