Расійскім працадаўцам вельмі не хапае айцішнікаў, асабліва з досведам

«61% працадаўцаў сутыкаецца з цяжкасцямі ў пошуку кандыдатаў з навыкамі ў сферы лічбавых тэхналогій. З іх найбольш дэфіцытнымі сталі праграмаванне і вэб-праграмаванне (19%), лічбавы маркетынг (16%) і распрацоўка праграм (14%)», — гаворыцца ў даследаванні.

Больш як у паловы працадаўцаў павялічыліся тэрміны пошуку кандыдатаў па выніках 2022 года, і толькі 6% заўважылі іх скарачэнне. Калі асноўны аб’ём вакансій раней закрываўся менш як за два месяцы, то цяпер для гэтага патрабуецца больш за тры месяцы.

Найхутчэйшым спосабам знайсці новага супрацоўніка застаецца добрая заробкавая прапанова. 75% працадаўцаў з прывабнай фінансавай кампенсацый знаходзяць адпаведных кандыдатаў менш як за тры месяцы.

«Складаней за ўсё стала знайсці супрацоўнікаў з досведам. У сярэднім павелічэнне тэрміну пошуку кандыдатаў з досведам працы больш за 6 гадоў склала 4-6 месяцаў… Падобная сітуацыя немінуча прыводзіць да падзення прадукцыйнасці кампаніі ў цэлым», — пракаментавалі ў HeadHunter.

Там дадалі, што 84% працадаўцаў аддаюць перавагу супрацоўнікам з досведам працы і без спецыяльнай адукацыі кандыдатам са спецыяльнай адукацыяй, але без досведу. Часцей за ўсё прыярытэт дасведчаным супрацоўнікам аддаюць у ІТ, раздробе і фінансах. Усе апытаныя працадаўцы ў гэтых сферах перакананыя, што аддадуць перавагу кандыдату з досведам і без спецыяльнай адукацыі.

«Известия» са спасылкай на джабборд SuperJob пішуць, што заробкавыя прапановы праграмістам у гэтым красавіку выраслі на 11,2% у параўнанні з мінулым годам. Аднак, на думку апытаных выданнем экспертаў, даходы будуць змяншацца, паколькі сфера запаўняецца пачаткоўцамі — выпускнікамі анлайн-курсаў.