Расія пачала пастаўляць першыя ўласныя літографы. У распрацоўцы ўдзельнічала беларуская кампанія

Працы па літографу былі завершаны гэтай вясной. Ён мае працоўнае поле з плошчай 22×22 мм і здольны апрацоўваць пласціны дыяметрам 200 мм. Працоўная даўжыня хвалі ўстаноўкі складае 365 нм, тэрмін службы — не менш за 5 гадоў, вага — 3500 кг.

Літограф прызначаны для праекцыйнага пераносу выявы фоташаблону на паўправадніковую пласціну і мультыплікацыі яго на пласціне пры вырабе звышвялікай інтэгральнай схемы (ЗВІС) з праектнай тапалогіяй 350 нм. Гэтыя нормы выкарыстоўваюцца для вырабу элементнай базы ў сілавой і аўтаэлектроніцы, а таксама ў прамысловых сістэмах.

Ён ствараўся для забеспячэння тэхналагічнай незалежнасці і прызначаны для мадэрнізацыі існуючых і аснашчэння новых мікраэлектронных вытворчасцяў. Зараз ідзе праца над наступным пакаленнем літографа з разрозненнем 130 нм.

«Планар» быў створаны ў 1962 годзе. Кампанія займаецца распрацоўкай і вырабам спецыяльнага тэхналагічнага абсталявання для зборкі паўправадніковых прыбораў, інтэгральных схем, сістэм мікраэлектронікі і іншых электронных вырабаў.

«Зеленаградскі нанатэхналагічны цэнтр» забяспечвае поўны цыкл распрацоўкі і вытворчасці мікрасхем. Галоўным напрамкам дзейнасці з’яўляецца развіццё сучасных тэхналогій вытворчасці і распрацоўка высокатэхналагічнай прадукцыі сумесна з вядучымі расійскімі навуковымі арганізацыямі і вытворчымі прадпрыемствамі.

Кампанія «Отраслевые решения» была створана для лакалізацыі ў Расіі ўсяго вытворчага ланцужка сілавой электронікі, запатрабаванай у энергетыцы, цяжкім і лёгкім машынабудаванні, прыборабудаванні, авіяцыі і іншых галінах прамысловасці.