Найвялікшая ў свеце ракета ад SpaceX выбухнула пасля запуску

Пасля неаднаразовых спроб запусціць Starship сённяшні запуск ракеты скончыўся няўдачай. Праз чатыры хвіліны па старце ракета выбухнула, пераадолеўшы адзнаку ў 38 кіламетраў. У трансляцыі SpaceX інцыдэнт назвалі «некантраляваным разлучэннем».

Шматразовая ракетная сістэма складаецца з касмічнага карабля Ship 24 і носьбіта Super Heavy. Вышыня ракеты дасягае 120 метраў, што вышэй за любую іншую ракету, створаную ў свеце. Super Heavy ў два разы магутнейшая за створаную NASA для палётаў на Месяц цяжкую ракету Space Launch System (SLS).

Тэставы палёт быў непілатаваным, ракета мусіла выканаць адзін віток вакол Зямлі, а Ship 24 прывадніцца ў Ціхім акіяне. Выпрабаванні Starship праводзяцца для будучых місій на Месяц і Марс.