Аддзел навін bel 8 красавіка 2025, 10:43

Сербія рыхтуецца ўвесці візы для беларусаў

Улады Сербіі могуць узмацніць візавы рэжым з Беларуссю, паведамляе Schengen.News.

Сербія плануе да канца 2026 года гарманізаваць сваю візавую палітыку з Еўрапейскім саюзам. Гэта неабходна для таго, каб краіна магла далучыцца да альянсу.

У Сербіі ўжо ўведзены візавы рэжым для грамадзян Катара, Манголіі, Амана і Кувейта. Наступным крокам стане адмена бязвізу для грамадзян Турцыі, Кітая, Азербайджана, Беларусі і Расіі. Цяпер ім не трэба атрымліваць візы для ўезду ў Сербію, але ЕС разглядае такую палітыку як патэнцыйную «дзірку» ў еўрапейскай бяспецы.

Беларусы могуць знаходзіцца ў Сербіі без візы цягам 30 дзён. Гэта краіна стала адным з напрамкаў рэлакацыі беларускіх ІТ-спецыялістаў. Таксама пасля пачатку вайны ва Украіне сюды пачалі вывозіць сваіх супрацоўнікаў і адкрываць офісы расійскія ІТ-кампаніі, напрыклад «Яндэкс».