Шэсць брытанскіх студый выступілі за ўгоду Microsoft і Activision Blizzard

Прадстаўнікі кожнай з шасці студый-распрацоўшчыкаў і выдаўцоў, якія працуюць у Вялікабрытаніі, заявілі, што CMA мусіць ухваліць угоду. Яны назвалі розныя довады: напрыклад, неабходнасць павысіць канкурэнцыю з PlayStation на мясцовым рынку або паляпшэнне ўмоў працы для супрацоўнікаў Activision Blizzard.

Рэгулятар апублікаваў адказы пяці кампаній на ўмовах ананімнасці. Шостая студыя — гэта 4J Studios, якая працавала над кансольнымі версіямі Minecraft. Яе прадстаўнікі паведамілі, што падчас сумеснай працы Microsoft паказала сябе сумленным і прафесійным партнёрам.

«Мы лічым магчымую куплю Activision Blizzard натуральным развіццём індустрыі. Гэтая ўгода не выклікае ў нас падстаў для турботы за нашыя ўласныя перспектывы», — заявілі ў 4J Studios.