Швейцарыя запусціла сваю бясплатную AI-мадэль з адкрытым кодам

Apertus — лацінскае слова «адкрыты» — створаны сумеснымі намаганнямі Швейцарскага федэральнага тэхналагічнага інстытута ў Лазане (EPFL), ETH Zurich і Швейцарскага нацыянальнага суперкамп’ютарнага цэнтра (CSCS). Усе тры арганізацыі з’яўляюцца дзяржаўнымі, а значыць мадэль пазіцыянуецца як інфраструктура ў грамадскіх інтарэсах.

«Apertus — гэта доказ таго, што штучны інтэлект можа быць грамадскай інфраструктурай нароўні з дарогамі, вадой ці электрычнасцю», — адзначыў адзін з прыхільнікаў праекта Джошуа Тан.

Распрацоўшчыкі апублікавалі не толькі саму мадэль, але і ўвесь працэс яе навучання: зыходны код, дакументацыю і наборы дадзеных. Apertus цалкам адпавядае швейцарскаму заканадаўству аб абароне дадзеных і аўтарскім праве, што робіць яе прывабнай для кампаній, абавязаных прытрымлівацца еўрапейскіх рэгуляцый.

Мадэль навучана на 15 трыльёнах токенаў больш чым на 1 000 мовах, прычым 40% дадзеных прыходзяцца на мовы, адрозныя ад англійскай — уключаючы швейцарскі дыялект нямецкай і раманшскую мову. Для навучання выкарыстоўваліся выключна публічна даступныя дадзеныя, а краўлеры не парушалі пратаколы opt-out, у адрозненне ад шэрагу камерцыйных ШІ-кампаній, якія абвінавачваліся ў нелегальным зборы кантэнту.

Apertus выпушчаны ў двух версіях — з 8 мільярдамі і 70 мільярдамі параметраў, і даступны праз Swisscom ці платформу Hugging Face. Да мадэлі могуць падключыцца даследчыкі, кампаніі і энтузіясты. Apertus падыходзіць для стварэння чат-ботаў, перакладчыкаў, адукацыйных і навучальных сістэм.