Як маюцца айцішнікі, якія плацяць новы падатак 10%. «Складана накасячыць»
Спойлер: ім амаль усё падабаецца.
Ад увядзення новага віду падатку — на прафдаход — мінула ўжо чатыры месяцы. Спачатку вакол ППД было вельмі шмат туману, цяпер трохі развіднелася. Віды дзейнасці, якія (не) падпадаюць пад ППД, дзякуючы расплывістым фармулёўкам арт. 7, усё яшчэ міннае поле. Але айцішнікі, здаецца, ужо не сумняваюцца. Спыталіся ў тых, хто перайшоў на ППД, як палёт.
Распрацоўшчыкі
«Больш за ўсё прэтэнзій да банка за шалёную камісію»
Мой від дзейнасці — распрацоўка софту праз інтэрнэт (у адпаведнасці з папраўкай да закона пра ППД). На ППД ад лютага 2023 года. Датуль працаваў як ІП на спрошчанай базе пад 6%, яшчэ раней — пад 3%.
Заказчык — кампанія з ЗША. Уся нашая каманда, якая раней працавала на праекце як ІП, перайшла на ППД. Вельмі доўга думалі і кансультаваліся перад тым, як пачынаць працу на ППД. Галоўным для мяне было, каб усё было легальна, каб «дзядзькі» не прыйшлі і нічога не выставілі. Цяпер ёсць упэўненасць, што ўсё робім правільна.
Плацеж атрымліваю раз на месяц. Нядаўна кампанія перайшла з прамых пераказаў на разлік праз payroll-платформу Deel — так грошы прыходзяць хутчэй. Выводжу іх на свой рахунак фізічнай асобы ў Прыёрбанку. Банк бярэ 3% камісіі ад сумы (!!!), што, вядома, засмучвае.
Пасля адлюстравання сродкаў на рахунку (яны адразу адлюстроўваюцца за мінусам камісіі) ствараю чэк у дадатку ППД на суму па курсе НБ ад даты паступлення на рахунак.
Выгода ў тым, што не трэба рабіць лішнія канверсіі, каб вывесці, як гэта было на ІП. Ну і ў цэлым без лішняй цяганіны ў плане дакументаў.
Больш за ўсё прэтэнзій тут да банка за такую шалёную камісію. Дарэчы, не падкажаце, якія яшчэ банкі прымаюць плацяжы цяпер нармальна? А тое, мяркуючы з навін, і ў Прыёры пераказы на грані.
Увогуле, арганізацыя па гэтым падатку цалкам зручная, аднак сам падатак мог бы быць і меншым.
«Ёсць невялікая асцярога, што дашлюць ліст шчасця»
Я займаюся франтэнд-распрацоўкай. Да 2023 года я працаваў па найманні, перайшоў на ППД, каб зменшыць падатак і мець магчымасць працаваць з некалькімі кампаніямі. (Увага! Такія дзеянні могуць быць расцэненыя падатковай як падмена працоўных адносін. — dev.by).
Спачатку я даведаўся, што сярод відаў дзейнасці, дазволеных для ППД, ёсць распрацоўка вэб-сайтаў. Нават гэтага было ўжо дастаткова, бо любы франтэнд-распрацоўшчык працуе з сайтамі. А ў дадатак я ўбачыў афіцыйны ліст ад міністэрства, што ІТ-паслугі, якія выконваюцца аддалена, падыходзяць пад ППД, і адпалі апошнія сумневы. Пры стварэнні чэка пазначаю назву паслугі — «распрацоўка вэб-сайтаў».
Уражанні ад ППД: вельмі зручна, проста і зразумела. Штомесяц, калі на карту прыходзяць грошы, дастаткова націснуць пару кнопак — і ўсё, наступнага месяца прыходзіць рахунак на выплату падатку.
Ёсць невялікая асцярога, што раптам я штосьці раблю не так і падатковая дашле «ліст шчасця», але такая верагоднасць малая, бо там складана накасячыць.
Што да працы на беларускія кампаніі, то тут страху няма. Раз іх нічога не бянтэжыць, то і мяне таксама. Фактычна супрацоўнікам аніводнай кампаніі я не з’яўляюся.
Тэхабслугоўванне камп’ютараў: «Чакаў ППД ад моманту першай згадкі»
Аказваю паслугі па тэхнічным абслугоўванні камп’ютараў. Як праз інтэрнэт, так і асабіста. У асноўным юрыдычным асобам і ІП.
ППД чакаў ад таго моманту, як падаткавікі яго ўпершыню згадалі. Чытаў навіны і форумы, дзе ўсё дзяліліся чаканнямі і рэальнасцю. Першапачаткова ППД хацелі дазволіць для любога віду дзейнасці, акрамя забароненых. У рэальнасці выявілася наадварот — спіс дазволеных відаў дзейнасці. Але мае паслугі трапляюць у гэты спіс.
Уражанні ў цэлым выдатныя. У адрозненне ад ІП, не трэба друкаваць дамовы, акты, насіць іх на подпіс. У разлікова-касавым абслугоўванні банка таксама няма неабходнасці. Падатак меншы. У ФСАН аплата напрамую адсутнічае (Чытайце наш разбор пра гэта ніжэй. — Заўвага. dev.by), ІМПЗ сама пералічвае збор з выплачаных падаткаў.
Адзіны істотны мінус ёсць у тым, што рахунак/чэк, выпісаны ў праграме ППД, не з’яўляецца першасным уліковым дакументам (ПУД, сумы ў ПУДах выводзяцца з-пад падаткаў, гэта выгадна кліентам). Але і гэта абяцаюць выправіць.
Як ІП на падаходным плаціў бы цяпер 20% падаткаў + 35% ад мінімальнага заробку ў ФСАН. Так як выдаткі мінімальныя, дадаткова выкарыстоўваў бы падатковы вылік 20%. Разам эфектыўная стаўка была б 16 працэнтаў.
У 2022-м у мяне было адпаведна 16% падатку (12,8% эфектыўная) + 35% ад мінімальнай ЗП у ФСАН.
У 2021-м і раней працаваў па спрошчанай сістэме: 5% + 35% у ФСАН.
Рэкруцёрка: «У падатковай спачатку не разумелі, чым я займаюся»
Я — ІТ-рэкруцёрка, працую на кампанію, у якой ужо няма юрасобы ў РБ, перайшла на ППД. Палёт нармальны.
Праграма ў цэлым працуе нармальна, усе інструкцыі актуальныя, усё зразумела. З боку падатковай ніякіх пытанняў таксама не было.
Перш чым перайсці на ППД, я некалькі разоў тэлефанавала ў падатковую і апісвала сваю сітуацыю. Першапачаткова яны ўвогуле не разумелі, чым я займаюся, што такое рэкрутынг. Але ў выніку прыйшлі да высновы, што мой выпадак падыходзіць пад арт. 7 артыкул і можна працаваць.
Важна — я не працую з юрыдычнымі пытаннямі (юрыдычная дзейнасць ліцэнзаваная, МПЗ забараняе юрыстам працаваць на ППД. — dev.by), але часткова займаюся працай HR, гэта мы таксама абмяркоўвалі.
У чэку пішу «аддаленая паслуга па працы з ІТ-персаналам (праца з рэзюмэ, справаздачы ды інш.)».
Ведаю, што бальнічныя дзяржавай не аплачваюцца. Але мяне гэтае пытанне не моцна хвалюе, бо мая кампанія іх кампенсуе на 100%.
Дарэчы, а што з пенсіямі і бальнічнымі? Ад dev.by
Усе спікеры пацвердзілі, што ў новай сістэме ім усё зразумела, цёмных месцаў не засталося. Аднак жа не змаглі адказаць, як ім налічваецца страхавы стаж і што з бальнічнымі. Двое выказалі ўпэўненасць, што ніякага стажу і бальнічных няма, бо яны «не плацяць у ФСАН».
У сувязі з гэтым мы вырашылі нагадаць, што збор у ФСАН уключаны ў структуру падатку на прафдаход. Ён складае 60 працэнтаў ад выплачанага падатку. Іншымі словамі, калі плацельшчык плаціць па стаўцы 10%, 6% ягонага даходу адпраўляецца ў ФСАН. Таму страхавы стаж улічваецца, іншая рэч што па асаблівай схеме.
Пачытаць пра яе падрабязна можна тут. Абавязковы ўзнос на пенсійнае страхаванне працаўніка — 29%. Пры гэтым, каб стаж залічылі 1:1, заробак мае быць не меншы за мінімальны (554 BYN ад 1 студзеня 2023 года). То-бок пенсійны ўзнос мае быць не меншы за 160,66 BYN на месяц. Калі ён меншы, страхавы стаж залічваецца прапарцыйна.
Так як плацельшчык ППД плаціць у ФСАН усяго 6% ад свайго даходу (пры стаўцы ППД 10%), патрабаванні да яго даходу ўзрастаюць. Ад яго па-ранейшаму чакаюць выплаты мінімум 160,66 BYN на месяц і толькі на такіх умовах згодныя залічыць стаж 1:1.
У гэтым сэнсе мінімальным даходам для падаткаплацельшчыка ППД робіцца 2678 BYN на месяц (160,66×100:6). Пры гэтым даход пры назначэнні пенсіі будзе залічаны ў прапорцыі прыкладна 5:1 (29:6). Зарабілі 3000 BYN — пры прызначэнні пенсіі будзе ўлічаны даход 620,7 BYN.
А бальнічныя плацельшчыкам ППД сапраўды аплачваць не будуць.
dev.by, як і іншым сумленным медыя, сёння вельмі складана: рэдакцыя працуе па-за межамі краіны, а нашыя рэкламныя даходы скараціліся ў некалькі разоў.
Але мы даем рады — з вашай дапамогай. Гэта вы дзеліцеся з намі інфанагодамі, думкамі, досведам, часам і ўвагай. А 170 чытачоў падтрымліваюць нас данатамі. У 2023 годзе мы хочам сабраць 1000 чытачоў-падпісчыкаў.
Дапамагчы нам можна праз Patreon.
І яшчэ крыптой, тут гаманцы.
Дзякуй, што прачыталі гэтае паведамленне.
Читать на dev.by