Алеся Чапкевич world 25 лютага 2026, 18:57

Супрацоўнікі Uber стварылі ШІ-клон CEO і звяртаюцца да яго за парадай, перш чым ісці да сапраўднага CEO

У Uber супрацоўнікі пачалі выкарыстоўваць ШІ-клон уласнага гендырэктара Дары Хасрушахі. Унутры кампаніі яго назвалі Dara AI.

1 каментарый

У Uber супрацоўнікі пачалі выкарыстоўваць ШІ-клон уласнага гендырэктара Дары Хасрушахі. Унутры кампаніі яго назвалі Dara AI.

Аб гэтым расказаў сам Хасрушахі ў падкасце The Diary of a CEO. Кажа, некаторыя каманды прапускаюць свае прэзентацыі праз яго ШІ-версію, каб падрыхтавацца да рэальнай прэзентацыі яму. Віртуальны CEO дапамагае дапрацаваць матэрыялы — ад структуры да слайдаў.

Наколькі шырока гэта выкарыстоўваецца ўнутры кампаніі, няясна. Але кейс паказальны: супрацоўнікі пачынаюць ужываць ШІ не толькі для распрацоўкі або аналітыкі, але і для падрыхтоўкі да «стрэсавых» момантаў накшталт прэзентацый топ-менеджменту, адзначае Business Insider.

Але ўзнікае больш агульнае пытанне, наколькі высока па аргструктуры зможа падняцца ШІ. Некаторыя кіраўнікі ўжо дапускаюць, што ў будучыні алгарытмы могуць замяніць і іх. CEO Google Сундар Пічаі раней казаў, што ШІ тэарэтычна здольны замяніць нават кіраўнікоў кампаній.

На пытанне, ці не турбуе Хасрушахі, што супрацоўнікі пакажуць Dara AI савету дырэктараў, ён засмяяўся, але адказаў сур’ёзна: пакуль ШІ не ўмее прымаць рашэнні на аснове новай інфармацыі ў рэальным часе, ён не ўяўляе пагрозы для топ-менеджменту: «Калі мадэлі змогуць вучыцца ў рэальным часе, тады я падумаю, што мы ўсе заменныя».

Пры гэтым Uber ужо актыўна выкарыстоўвае ШІ у бізнесе. У кампаніі ёсць падраздзяленне AI Solutions, дзе падрадчыкі навучаюць мадэлі для кліентаў.

Для інжынераў гэта пакуль выглядае хутчэй як падтрымка, а не замена. Па словах Хасрушахі, каля 30% распрацоўшчыкаў кампаніі — «прасунутыя карыстальнікі» ШІ. І калі прадуктыўнасць інжынераў дзякуючы ШІ вырасце на чвэрць, то ён будзе наймаць больш, каб рабіць усё хутчэй. Але можа быць і інакш: «Я магу і не павялічваць колькасць інжынераў. Замест гэтага дадам агентаў і куплю яшчэ GPU у Nvidia».