Сацсетка Джэка Дорсі Bluesky прыцягнула $8 млн інвестыцый і паказала першую платную функцыю

Інвестраўнд узначаліла фірма Neo, сярод іншых інвестараў — адзін з распрацоўшчыкаў Kubernetes Джо Беда, сузаснавальнік Red Hat Боб Янг, заснавальнік Replit Амджад Масад ды іншыя. Bluesky плануе пашырыць каманду, аперацыйныя выдаткі і затраты на інфраструктуру, а таксама на падтрымку распрацоўкі пратакола AT, на якім працуе сацсетка.

Сэрвіс анансаваў платную функцыю: карыстальнікі змогуць пазначыць у якасці імя свой асабісты дамен. Гэта можна зрабіць самому пры неабходных ведах аб рэгістрацыі даменаў і DNS-наладах. Сацсетка будзе працаваць з рэгістратарам даменаў Namecheap, абяцаюць, што наладжванне зойме «лічаныя хвіліны».

Джэк Дорсі заснаваў Bluesky у 2019 годзе пры падтрымцы Twitter для распрацоўкі новага стандарту дэцэнтралізаваных сацсетак, у 2021 годзе праект стаў незалежным. Пасля сыходу з Twitter Дорсі стаў сябрам рады дырэктараў Bluesky. На пачатку 2023 года праграма стала даступная карыстальнікам, цяпер у сацсеткі аўдыторыя перавышае 100 тысяч чалавек.