Стваральнік Agile: ШІ — як джын, выконвае каманды не так, як задумана

У інтэрв’ю падкасту The Pragmatic Engineer Бэк заявіў, што сучасныя ШІ-агенты нагадваюць джынаў: яны выконваюць запыты, але часта не так, як ад іх чакаюць. «Яны не робяць тое, што вы маеце на ўвазе. У іх ёсць свая логіка», — адзначыў ён.

Паводле словаў эксперта, узаемадзеянне са ШІ можа быць непрадказальным і выклікаць пачуццё фрустрацыі, нягледзячы на асобныя выпадкі надзвычай дакладных рашэнняў: «Часам здаецца, што агент проста здзекуецца з цябе: выдаляе ўсе тэсты і прыкідваецца, што праца завершана».

Бэк, які стаяў ля вытокаў метадалогіі Agile ў 2001 годзе, падкрэсліў, што ва ўмовах росту ролі ШІ асаблівую каштоўнасць набываюць не тэхнічныя дэталі, а арганізацыйныя навыкі: пастаноўка мэтаў, кантроль складанасці і вядзенне архітэктуры праекта. На яго думку, здольнасць «правільна расстаўляць у кодзе амперсанды і дужкі» сыходзіць на другі план.

Бэк прызнае, што зараз атрымлівае ад сваёй працы больш задавальнення, чым за ўсю 50-гадовую кар’еру — менавіта дзякуючы эксперыментам са ШІ. Ён актыўна тэсціруе розныя інструменты і перакананы, што ў бягучай тэхналагічнай няпэўнасці важна спрабаваць усё даступнае: «Ніхто не ведае, які працэс акажацца лепшым. Ісціна праявіцца з мноства спробаў».

Ён таксама параўнаў узаемадзеянне са ШІ з азартнай залежнасцю: «Кожны запуск — як гульня ў слот-машыну. Часам вынік ідэальны, і ты зноў націскаеш на кнопку ў надзеі на магію. Гэта замкнёны цыкл». ШІ, паводле яго словаў, здольны паскорыць распрацоўку, але ўсё яшчэ не можа замяніць інтуіцыю і сістэмнае мысленне дасведчанага інжынера.