Spotify хоча запусціць у ЕС падпіску ў абыход App Store

Еўракамісія лічыць, што дзейныя правілы App Store не дазваляюць распрацоўшчыкам іншых прадуктаў інфармаваць карыстальнікаў аб альтэрнатыўных і больш танных стрымінгавых музычных сэрвісах па-за межамі экасістэмы iOS. Рэгулятар заклікаў змяніць дзейную палітыку платформы і абавязаў даць іншым распрацоўшчыкам магчымасць свабодных зносін са сваімі кліентамі.

Згодна з прапанаваным абнаўленнем, інфармацыя пра кошт падпіскі будзе размяшчацца ўнутры праграмы і суправаджацца спасылкай на вонкавы рэсурс, дзе карыстальнікі змогуць даведацца больш падрабязна пра тарыфы і аформіць падпіску. Калі Apple ухваліць абнаўленне, то еўрапейскія карыстальнікі змогуць бачыць у праграме інфармацыю пра тарыфы і іншыя функцыі, якія прапануе платформа па-за межамі iOS.

Раней сёлета Spotify абвясціла пра планы дазволіць пакупкі ўнутры праграмы для iOS у ЕС, але вырашыла пакуль не спяшацца пасля таго, як Apple раскрыла свае планы па выкананні закона «Аб лічбавых рынках» ЕС (DMA). У 2022 годзе Apple дазволіла некалькім праграмам, у тым ліку Spotify, Netflix і Kindle, размяшчаць спасылкі на свае вэб-сайты, аднак дагэтуль забараняла публікаваць інфармацыю пра кошт падпісак на іх.