Менш эксперыментуюць і прытрымліваюцца таго, што вядома і працуе: выйшла новая справаздача SlashData пра распрацоўшчыкаў
Распрацоўшчыкі сталі выдаткоўваць менш часу на гулі з новымі інструментамі і фрэймворкамі і прытрымліваюцца правераных тэхналогій — але пры гэтым усё больш цікавасці праяўляюць да блакчэйну. Пра гэтыя і іншыя высновы расказваюць аналітыкі SlashData ў свежым дакладзе State of the Developer Nation. Удзел у апытанцы ў чэрвені-жніўні ўзялі больш як 26 тысяч кодараў з 163 краін.
Найпапулярнейшым фрэймворкам сярод распрацоўшчыкаў застаецца React, прычым апошнія два гады яго папулярнасць нязменна расце, а, напрыклад, jQuery — імкліва падае.
Уладальнікам найвялікшай супольнасці застаецца JavaScript. Паводле падлікаў SlashData, штодня для ўсякага-рознага — ад вэб-распрацоўкі і мабільных праграм да гульнявой, воблачнай і бэкэнд-распрацоўкі — яго выкарыстоўваюць 19,6 млн кодараў.
Сямімільнымі крокамі рухаецца кам’юніці Java — за апошнія два гады яно павялічылася амаль у два разы ад 8,3 млн да 16,5 млн кодараў. Для параўнання, сусветная папуляцыя праграмістаў за гэты перыяд расла ўдвая павольней. Але самыя хуткарослыя мовы ўсё ж Kotlin і Rust: у іх рост перавысіў 2х. Python за апошнія два гады дзякуючы запатрабаванасці дата-саентыстаў і машыннага навучання прыбавіў каля 8 млн распрацоўшчыкаў.
Таксама ў справаздачы разглядаўся блакчэйн: ён знаходзіць прымяненне ў самых розных сферах, уключна з фінансамі, лагістыкай і дзяржкіраваннем.
Сярод тэхналогій на базе блакчэйну найменшую цікавасць для распрацоўшчыкаў з’яўляюць неўзаемазамяняльныя токены (NFT), найбольшую — крыптавалюты: 27% рэспандэнтаў у гэты момант альбо вывучаюць пытанне, альбо працуюць над звязанымі з крыптой праектамі. Аднак у цэлым толькі 9% апытаных адказалі, што займаюцца блакчэйн-тэхналогіямі.
Акрамя гэтага, даследчыкі цікавіліся тым, якія фактары прыводзяць моладзь у праграмаванне і чаго яна чакае ад сваёй працы. Большасць ІТ-студэнтаў, якія бралі ўдзел у апытанцы, натхняе магчымасць вырашаць задачы і праблемы (32%), на другім месцы сярод матыватараў — імкненне стаць экспертам у сваёй вобласці, далей — праца над інавацыямі і праца над складанымі амбіцыйнымі праектамі.
Читать на dev.by