ЗША праверыць усіх 55 млн уладальнікаў віз і дэпартуе парушальнікаў

У Дзярждэпартаменце ЗША заявілі, што ўсе ўладальнікі віз, уключаючы турыстаў, студэнтаў і работнікаў, знаходзяцца пад рэжымам «бесперапыннай праверкі». У выпадку выяўлення інфармацыі аб парушэннях візавага рэжыму, злачыннай дзейнасці або сувязях з тэрарызмам віза будзе адкліканая, а замежнікі, якія знаходзяцца ў ЗША — дэпартаваныя.

Паводле дадзеных Міністэрства ўнутранай бяспекі, у краіне ў мінулым годзе пражывалі 12,8 мільёна ўладальнікаў грын-карт і 3,6 мільёна часовых віз. Новыя правілы пашыраюць маштаб праверак, якія раней у асноўным закраналі студэнтаў і ўдзельнікаў абменных праграм. Цяпер яны закрануць усе катэгорыі візавых уладальнікаў, у тым ліку тых, хто знаходзіцца за межамі ЗША са шматразовымі турыстычнымі візамі.

Дзярждэпартамент падкрэсліў, што ў праверках улічваюцца іміграцыйныя і паліцэйскія запісы, дадзеныя спецслужбаў, а таксама актыўнасць у сацыяльных сетках. Раней з красавіка замежным студэнтам пры сумоўі на візу было прадпісана адкрываць свае акаўнты для праверкі публікацый і перапіскі.

Акрамя таго, амерыканскія ўлады абвясцілі аб спыненні выдачы працоўных віз замежным кіроўцам грузавікоў. Дзяржсакратар Марка Рубіа заявіў, што гэта рашэнне звязана з пагрозамі бяспекі дарожнага руху і канкурэнцыяй з амерыканскімі дальнабойшчыкамі. Толькі са студзеня, паводле дадзеных ведамства, было ануляванае больш за 6 тысяч студэнцкіх віз, у тым ліку некалькі соцень — па падазрэнні ў сувязях з тэрарызмам.

Эксперты папярэджваюць, што такія крокі могуць мець сур’ёзныя эканамічныя наступствы. Па словах старэйшага навуковага супрацоўніка Савета па міжнародных адносінах Эдварда Алдэна, абмежаванні даюць сігнал працадаўцам аб рызыках найму замежных работнікаў.