ЗША створаць адзіны стандарт часу на Месяцы

Паводле даных Reuters, адзіны стандарт часу на Месяцы мае стаць эталонам часу для месяцовых касмічных апаратаў і спадарожнікаў. «Тыя ж гадзіны, якія ёсць у нас на Зямлі, на Месяцы ішлі б з іншай хуткасцю», — растлумачыў кіраўнік аддзела касмічнай сувязі і навігацыі NASA Кевін Когінс.

У даручэнні Белага дома сказана, што для чалавека на Месяцы зямныя гадзіны будуць у сярэднім губляць 58,7 мікрасекунды на суткі, ёсць і іншыя адхіленні, якія яшчэ больш аддаляюць месяцовы час ад зямнога. Без стандарту будзе складана перадаваць даныя паміж касмічнымі апаратамі, а таксама сінхранізаваць сувязь паміж Зямлёй, спадарожнікамі, базамі і астранаўтамі.

На Зямлі час рэгулююць на аснове сусветнага каардынаванага часу (Coordinated Universal Time, UTC). Міжнародны стандарт абапіраецца на шырокую сетку атамных гадзіннікаў, размешчаных у розных пунктах Зямлі. Амерыканскія ўлады мяркуюць, што для адзінага стандарту месяцовага часу атамныя гадзіннікі прыйдзецца размясціць на Месяцы.

NASA плануе ў верасні 2026 года ажыццявіць першую высадку астранаўтаў на Месяц ад моманту завяршэння праграмы «Апалон» у 1970-х гадах. Палёт астранаўтаў вакол Месяца запланаваны на верасень 2025 года. Таксама місіі на Месяц рыхтуюць Кітай і Індыя. У студзені гэтага года Японія стала пятай краінай, якая здолела пасадзіць касмічны апарат на Месяц.