Стала вядома, якія краіны найчасцей выдаюць беларусам шэнгенскія візы. З адной з іх якраз цяпер стала складаней

Топ-5 краін, якія выдалі беларусам найбольш віз, выглядае так:

• Германія — 50 459
• Італія — 49 588
• Польшча — 20 952
• Венгрыя — 13 953
• Францыя — 11 889

Гэта статыстыка ўключае толькі так званы «чысты шэнген», гэта значыць візы тыпу C — нацыянальныя візы тыпу D у ёй не прадстаўлены. Падзелу па мэтах візіту Еўракамісія не прыводзіць — турыстычныя, гасцявыя і іншыя віды віз аб’яднаны ў адной лічбе.

Амаль усе ключавыя для беларусаў краіны скарацілі колькасць выдадзеных віз — Польшча, напрыклад, амаль на траціну. Толькі Італія павялічыла колькасць выдадзеных віз больш чым на 10%.

Акрамя таго, рэзка вырасла доля адмоваў. Напрыклад, пры атрыманні нямецкага «шэнгену» — да 2,6%, венгерскага — да 2,3%, а Францыя адмаўляла беларусам у 6,2% выпадкаў. Беларусь уваходзіць у лік краін, грамадзянам якіх найчасцей адмаўляюць у шэнгенскай візе.

З краін, якія толькі нядаўна пачалі выдаваць беларусам шэнгенскія візы, Балгарыя ў мінулым годзе аформіла 3792, але шматразовых з іх было толькі каля траціны. Румынія задаволіла толькі 386 заяў, з якіх шматразовых — крыху больш за 20%. Літва выдала беларусам 3781 візу, Латвія — 967, а Чэхія — усяго 93.

Учора стала вядома, што візавы цэнтр Італіі ў Мінску цалкам прыпыняе прыём заяў на верыфікацыю — абавязковую праверку асобы перад падачай дакументаў на афармленне візы — з 21 мая да канца ліпеня. У якасці прычыны называецца занадта вялікая колькасць запытаў на правядзенне гэтай працэдуры.