Стартап Figure паказаў, як робаты-гуманоіды перастаўляюць рэчы і гаспадараць на кухні

Helix дазваляе двум робатам працаваць адначасова, вырашаючы агульную задачу маніпулявання прадметамі, якіх яны ніколі раней не бачылі. Сістэма была навучаная на ~500 гадзінах даных тэлекіраваных паводзін. Figure сцвярджае, што робаты, абсталяваныя Helix, могуць падымаць практычна любы невялікі прадмет хатняга начыння на каманду.

У адрозненне ад папярэдніх падыходаў, Helix выкарыстоўвае адзіны набор вагаў нейроннай сеткі для вывучэння ўсіх мадэляў паводзін — падняцця і размяшчэння прадметаў, выкарыстання скрынь і халадзільнікаў, а таксама ўзаемадзеяння паміж робатамі — без аніякай спецыяльнай налады для канкрэтнай задачы.

Хатняя абстаноўка лічыцца складаным асяроддзем для робатаў праз разнастайнасць пакояў, кухняў, ванных пакояў і прадметаў інтэр’еру. У адрозненне ад кантраляваных прамысловых умоў, дамы напоўненыя незлічонымі прадметамі з непрадказальнымі формамі, памерамі, колерамі і тэкстурамі.

Каб быць карыснымі ў хатніх умовах, робаты маюць быць здольныя генераваць новыя мадэлі паводзін на патрабаванне, асабліва для аб’ектаў, якіх яны ніколі раней не бачылі. Навучанне робатаў нават адной новай задачы патрабуе значных выдаткаў часу і рэсурсаў.

У лютым 2024 года Figure прыцягнула $ 675 мільёнаў пры ацэнцы ў $2,6 мільярда. Сярод інвестараў былі Джэф Безас, Microsoft, Nvidia і OpenAI Startup Fund. Тады ж стартап дамовіўся з OpenAI аб распрацоўцы АІ-мадэляў для робатаў-гуманоідаў, аднак пазней адмовіўся ад супрацоўніцтва. У лютым гэтага года Reuters паведаміла, што Figure вядзе перамовы аб інвестыцыях пры ацэнцы ў $39,5 мільярда.