Стрымер абурыў Nintendo: кампанія падала ў суд за трансляцыю пірацкіх гульняў Switch

Nintendo падала ў суд на стрымера Джэсі Кейгіна, вядомага пад псеўданімам Every Game Guru, за неаднаразовую трансляцыю пірацкіх версій гульняў для Switch. Кейгін трансляваў гульні на розных платформах, такіх як YouTube, Twitch, Discord, TikTok і Kick.

Пазоўнік абвінавачвае Кейгіна ў тым, што ад пачатку 2022 года ён правёў «несанкцыянаваную дэманстрацыю геймплэя» больш як 50 гульняў Nintendo, уключаючы як мінімум 10 гульняў, якія на той момант яшчэ не былі выпушчаныя. Сярод апошніх «ахвяр» стрымера — The Legend Of Zelda: Echoes of Wisdom, Super Mario Party Jamboree і Mario & Luigi Brothership.

Кампанія сцвярджае, што Кейгін не толькі трансляваў пірацкія гульні, але і распаўсюджваў сярод сваёй аўдыторыі інструкцыі па атрыманні ранняга доступу да гульняў Nintendo і абыходзе тэхналагічных мер абароны ад пірацтва. Кампанія неаднаразова спрабавала заблакаваць каналы Кейгіна на розных платформах, але той працягваў адкрываць новыя, выхваляючыся, што ў яго ёсць «тысячы аднаразовых акаўнтаў» і ён «можа рабіць гэта хоць цэлы дзень».

У пазове Nintendo прыводзіць доказы таго, што Кейгін запускаў гульні на эмулятары, дэманструючы ў сваіх трансляцыях паказчыкі частаты кадраў і прадукцыйнасці. Кампанія сцвярджае, што Кейгин падаваў гледачам усё неабходнае для пірацтва, уключаючы спасылкі на рэпазіторыі ROM, эмулятары і незаконна атрыманыя ключы прадукту, неабходныя для іх запуску.

Распрацоўшчык запатрабаваў пакрыць шкоду: $150 тысяч за кожнае меркаванае парушэнне аўтарскіх правоў і $2,5 тысячы за кожны выпадак абыходу тэхнічных сродкаў абароны. Таксама пазоўнік дамагаецца спынення дзейнасці Кейгіна, канфіскацыі эмулятараў і ўзламаных кансоляў.