Суд прызнаў Google манапалістам на рынку рэкламы ЗША. Кампанію могуць падзяліць

Акруговы суддзя ЗША Леоні Брынкема ў Аляксандрыі, штат Вірджынія, прызнала Google адказнай у «наўмысным набыцці і падтрыманні манапольнай улады» на рынках сервераў выдаўцоў рэкламы і на рынку рэкламных біржаў, якія з’яўляюцца пасярэднікамі паміж пакупнікамі і прадаўцамі.

Суддзя таксама адзначыла, што сродкі, якія атрымліваюць выдаўцы ад продажу рэкламы з выкарыстаннем гэтых тэхналогій, з’яўляюцца «жыццёва важнымі» для інтэрнэту. Пры гэтым антыманапольным органам не ўдалося даказаць асобнае абвінавачанне ў тым, што кампанія мае манаполію на рэкламныя сеткі для рэкламадаўцаў.

Рашэнне суда адкрывае шлях да новага слухання для вызначэння мер, якія Google павінна здзейсніць для аднаўлення канкурэнцыі на гэтых рынках, напрыклад, продаж частак свайго бізнесу ў рамках яшчэ аднаго судовага разбору, дата якога пакуль не прызначаная.

Міністэрства юстыцыі ЗША заявіла, што Google павінна будзе прадаць як мінімум свой Google Ad Manager, які ўключае сервер аб’яў для выдаўцоў і рэкламную біржу кампаніі. Раней агенцтва Reuters паведамляла, што Google разглядала магчымасць продажу сваёй рэкламнай біржы, каб супакоіць еўрапейскіх антыманапольных рэгулятараў.

Google выказала нязгоду з рашэннем адносна сваіх інструментаў для выдаўцоў і паведаміла, што падрыхтуе апеляцыю. «Мы выйгралі палову гэтай справы і абскарджваем другую палову», — сказала Лі-Эн Малхоланд, віцэ-прэзідэнт Google па пытаннях рэгулявання. Яна дадала, што ў выдаўцоў ёсць мноства варыянтаў, і яны выбіраюць Google, бо яе інструменты простыя, даступныя і эфектыўныя.

Генеральны пракурор ЗША Памэла Бондзі назвала гэта рашэнне «знакавай перамогай у пастаяннай барацьбе за спыненне манапалізацыі Google у лічбавай грамадскай прасторы». Сенатар ЗША Эмі Клобушар, дэмакрат ад Мінесоты, якая раней узначальвала антыманапольны падкамітэт, назвала гэта рашэнне «вялікай перамогай для спажыўцоў, малога бізнесу і стваральнікаў кантэнту, якое адкрые лічбавыя рынкі для большай інавацыйнасці і зніжэння коштаў».

Цяпер Google сутыкаецца з магчымасцю, што два суды ЗША прымусяць яе прадаць актывы або змяніць сваю камерцыйную практыку. На наступным тыдні ў Вашынгтоне пачнецца судовы працэс па запыце Міністэрства юстыцыі аб тым, каб прымусіць Google прадаць свой браўзер Chrome і прыняць іншыя меры для спынення дамінавання ў анлайн-пошуку.