Тарыфы Трампа паставілі пад удар увесь ІТ-сектар: ад лагістычных ланцужкоў да развіцця ШІ

Аналітыкі папярэджваюць, што тарыфы могуць сур’ёзна падарваць шматмільярдныя намаганні бігтэха па стварэнні інфраструктуры для штучнага інтэлекту ў ЗША. Наступствы тарыфнай палітыкі могуць супярэчыць ключавой мэце адміністрацыі Трампа — зрабіць ЗША сусветным лідарам у ШІ-галіне. Кампаніі, такія як Oracle і SoftBank, раней заяўлялі пра планы значных інвестыцый у ШІ пасля вяртання Трампа ў Белы дом. Аднак новыя тарыфы могуць зрабіць гэтыя інвестыцыі значна даражэйшымі.

Электроніка, уключаючы смартфоны, ПК і абсталяванне для цэнтраў апрацоўкі дадзеных, з’яўляецца другой па велічыні катэгорыяй імпарту ў ЗША, дасягнуўшы амаль $486 мільярдаў летась. Аналітыкі Bernstein ацэньваюць імпарт абсталявання для апрацоўкі дадзеных прыкладна ў $200 мільярдаў даляраў, пераважна з Мексікі, Тайваня, Кітая і В’етнама. Паводле меркавання экспертаў, тэхналагічным гігантам давядзецца пераразмяркоўваць свае капітальныя выдаткі і шукаць альтэрнатыўных пастаўшчыкоў.

Асабліва моцна тарыфы ўдарылі па Apple. Значная частка вытворчасці iPhone па-ранейшаму сканцэнтраваная ў Кітаі, на які цяпер распаўсюджваецца тарыф у 54%. Аналітыкі Rosenblatt Securities прагназуюць, што, калі Apple перакладзе гэтыя выдаткі на спажыўцоў, цэны на iPhone могуць вырасці на 30–40%. Напрыклад, кошт базавай мадэлі iPhone 16 можа павялічыцца да $1142, а iPhone 16 Pro Max з 1 ТБ памяці можа падаражэць амаль да $2300. Акцыі Apple адрэагавалі на навіну рэзкім падзеннем больш чым на 9%, што стала найгоршым аднадзённым паказчыкам з сакавіка 2020 года.

Акрамя Кітая, тарыфы закранулі В’етнам (46%) і Індыю (26%), якія сталі важнымі вытворчымі цэнтрамі для Apple у межах стратэгіі дыверсіфікацыі лагістычных ланцугоў. Аналітыкі Morgan Stanley лічаць, што тарыфы могуць скараціць прыбытак Apple на 7% у наступным годзе, што эквівалентна $8,5 мільярдам. Каб кампенсаваць дадатковыя выдаткі, Apple, магчыма, давядзецца павысіць цэны на сваю прадукцыю ў ЗША на 17–18%.

Тарыфы таксама ўяўляюць пагрозу для найбуйнейшых пастаўшчыкоў воблачных паслуг, такіх як Microsoft, Alphabet і Amazon, якія ўжо сутыкаюцца са скептыцызмам інвестараў наконт вялікіх укладанняў у ШІ. Аналітыкі папярэджваюць, што выдаткі на будаўніцтва цэнтраў апрацоўкі дадзеных значна павялічацца. D.A. Davidson адзначае, што Microsoft і Amazon ужо дэманструюць больш збалансаваны і асцярожны падыход да пашырэння сваіх дата-цэнтраў. Microsoft за апошнія паўгода адмовілася ад праектаў цэнтраў апрацоўкі дадезных у ЗША і Еўропе праз лішак прапановы.

Акцыі Microsoft, Amazon і Alphabet на фоне навін таксама прадэманстравалі зніжэнне. Аналітыкі HSBC папярэджваюць пра магчымае запаволенне выдаткаў воблачных кампаній у наступным годзе і знізілі мэтавы кошт акцый Nvidia, хоць першапачаткова працэсары былі вызваленыя ад новых тарыфаў. Аднак існуе верагоднасць увядзення мэтанакіраваных тарыфаў на чыпы пазней, што можа закрануць нават тых вытворцаў, якія разлічвалі на выключэнні для сваёй галіны.

На думку спецыялістаў Quilter Cheviot, тарыфы могуць прывесці да зніжэння попыту, што пацягне за сабой скарачэнне выдаткаў на праграмнае забеспячэнне і воблачныя сэрвісы. Alphabet і Meta могуць сутыкнуцца з падвойным ударам, бо эканамічныя цяжкасці могуць прывесці да скарачэння выдаткаў на лічбавую рэкламу. Эксперт Brian Wieser паведамляе, што каля $10 мільярдаў даходу Meta у ЗША прыходзіцца на рэкламадаўцаў за межамі краіны, пераважна з Кітая, а Кітай уяўляе палову вядучых прадаўцоў на маркетплэйсе Amazon у ЗША, што, імаверна, з’яўляецца асноўным драйверам іх рэкламнага бізнесу.

Новыя тарыфы фактычна ўводзяць падатак на ўнутраныя інавацыі, што ўскладняе амерыканскім кампаніям захаванне лідарства ў наступным тэхналагічным цыкле. Эксперты Wedbush назвалі тарыфы Трампа «ірацыянальнымі і абсурднымі» і папярэдзілі, што яны ставяць пад пагрозу «амерыканскае лідарства і выключнасць у найважнейшай галіне». Яны таксама асцерагаюцца, што адказныя меры з боку Кітая могуць падарваць ланцуг паставак для штучнага інтэлекту, уключаючы пастаўкі перадавых чыпаў Nvidia.