3,6% размаўляюць, але радуюцца ўсе. Што айцішнікі думаюць пра беларускую мову на працы?

Толькі 3,6% удзельнікаў анкеты рэгулярна выкарыстоўваюць беларускую мову ў зносінах з калегамі.

16,7% робяць гэта часам, а 10,7% пераходзяць на беларускую мову падчас зносін з калегамі з Польшчы і Украіны.

72,7% падчас працы не выкарыстоўваюць беларускай мовы зусім.

У большасці выпадкаў (74%), калі айцішнікі размаўлялі з калегамі па-беларуску, ніякіх праблем не было. 17% удзельнікаў анкеты адзначылі, што ім давялося пераходзіць на рускую мову, бо калегі іх не разумелі. А 5% апытаных (30 чалавек) нават сутыкнуліся з моўнай дыскрымінацыяй.

Пры гэтым амаль усе (84,4%) апытаныя айцішнікі адчуваюць радасць, калі чуюць беларускую мову ад калег.

Аднак такія сітуацыі даволі рэдкія. 43% ўдзельнікаў анкеты не сустракалі ў сваёй кампаніі калег, якія хаця б часам размаўлялі па-беларуску. У 50,1% ёсць некалькі такіх калег.