Трамп зноў за сваё: павысіў тарыфы для 14 краін. У спісе — Японія і чамусьці Казахстан

Трамп апублікаваў у сацсетцы Truth Social копіі лістоў, адрасаваных кіраўнікам замежных дзяржаў. У іх змяшчаецца інфармацыя аб новых тарыфных стаўках: ад 25% да 40% у залежнасці ад краіны. Так, тавары з Японіі, Паўднёвай Карэі, Малайзіі, Казахстана і Туніса будуць абкладзены пошлінай у 25%, з Паўднёвай Афрыкі і Босніі — у 30%, з Інданезіі — у 32%, з Бангладэш і Сербіі — у 35%, з Тайланда і Камбоджы — у 36%, а з Лаоса і М’янмы — у 40%.

Амерыканскі прэзідэнт падкрэсліў, што тарыфы могуць быць зменены, у залежнасці ад палітычных і эканамічных адносін ЗША з кожнай краінай. Ён таксама папярэдзіў: любыя спробы ўвесці зваротныя пошліны прывядуць да аўтаматычнага павелічэння амерыканскіх тарыфаў.

Першапачаткова павышэнне павінна было ўступіць у сілу 9 ліпеня. Аднак Трамп падпісаў указ аб пераносе тэрміну на 1 жніўня, патлумачыўшы гэта «дадатковымі дадзенымі і рэкамендацыямі ад высокапастаўленых чыноўнікаў». Прэс-сакратар Белага дома Караліна Левіт заявіла, што ў бліжэйшыя дні могуць быць накіраваны новыя лісты іншым краінам.

Прэм’ер-міністр Японіі Сігэру Ісіда назваў рашэнне ЗША «глыбока прыкрым» і склікаў экстранае пасяджэнне ўрада. Паўднёвая Карэя заявіла аб гатоўнасці «прыняць рашучыя меры» ў выпадку нестабільнасці на рынках. МЗС Малайзіі і Міністэрства фінансаў Тайланда выказалі надзею на дасягненне кампрамісу і ўжо накіравалі Вашынгтону свае прапановы.

Эканамічны эфект ад новых мер адчуваецца ўжо зараз. Акцыі японскіх аўтавытворцаў упалі: Toyota страціла 4%, Nissan — больш за 7%, Honda — амаль 4%. Усе тры вядучыя фондавыя індэксы ЗША завяршылі дзень у мінусе: Dow Jones упаў на 422 пункта, S&P 500 — на 0,79%, Nasdaq — на 0,92%.

Агульны аб’ём імпарту ЗША з закранутых краін склаў у 2024 годзе $465 мільярдаў, прычым на Японію і Паўднёвую Карэю прыйшлося больш за 60% ад гэтай сумы. Асноўныя катэгорыі імпарту — аўтамабілі, запчасткі, электроніка, тэкстыль і каштоўныя металы. У прыватнасці, ПАР з’яўляецца галоўным пастаўшчыком плаціны, а Малайзія — другой найбуйнейшай крыніцай паўправаднікоў.

Пасля кароткатэрміновай паўзы з красавіка, у ходзе якой дзейнічалі універсальныя пошліны ў 10%, ЗША аднаўляюць ціск. Пакуль былі заключаны толькі рамачныя гандлёвыя пагадненні з Вялікабрытаніяй, В’етнамам і Кітаем. Перамовы з ЕС, Індыяй і шэрагам іншых краін працягваюцца.