Трамп запускае свой «Netflix для рэспубліканцаў»

Truth+ пазіцыянуецца як платформа з «сямейнымі тэлеканаламі і відэа па запыце». Кантэнт Newsmax, вядомага сваёй лаяльнасцю да MAGA-руху, стане флагманскім напрамкам стрымінгу. Новы сэрвіс даступны карыстальнікам па ўсім свеце праз аплікацыі для iOS, Android, вэба, а таксама на Apple TV, Roku, Amazon Fire TV і Android TV.

Генеральны дырэктар Trump Media, былы кангрэсмен-рэспубліканец Дэвін Нуньес, заявіў, што мэта платформы — супрацьстаяць «ліберальнаму медыя-маналіту» і прапаноўваць «жорсткі, неліберальны аналіз і каментарыі». Раней Нуньес стаў вядомы сваёй крытыкай расследавання спецпракурора Мюлера супраць Трампа.

З’яўленне Truth+ узмацніла апасенні экспертаў наконт усё больш шчыльнага зліцця інтарэсаў Трампа як прэзідэнта і ўладальніка прыватнага медыяхолдынгу. Newsmax раней ужо трапляў ў цэнтры скандалаў, уключаючы распаўсюджванне недакладнай інфармацыі пра выбары 2020 года. Цяпер гэты канал не толькі атрымлівае прамы доступ да аўдыторыі праз платформу Трампа, але і фактычна робіцца яе тварам.

Амерыканскія палітыкі-дэмакраты і праваабаронцы ўказваюць на відавочны канфлікт інтарэсаў. Трамп застаецца асноўным уладальнікам Trump Media, перадаўшы акцыі ў траст пад кіраваннем свайго сына, Дональда Трампа-малодшага, а не ў сляпы траст, як гэта прынята для абраных службовых асоб у ЗША.