Трамп заявіў, што Microsoft вядзе перамовы пра куплю TikTok

Reuters паведамляе, што Трамп адказаў сцвярджальна на пытанне рэпарцёраў, ці вядзе Microsoft перамовы пра куплю TikTok. Прэзідэнт таксама дадаў, што «цікавасць да TikTok вельмі вялікая» і што будзе «шмат людзей, якія зробяць стаўкі».

Раней Трамп казаў, што адкрыты для таго, каб Ілан Маск купіў праграму, калі мільярдэр захоча гэта зрабіць. Аднак Маск публічна не пракаментаваў прапановы Трампа. Акрамя таго, мільярдэр Фрэнк Маккорт зрабіў афіцыйную прапанову наконт куплі сацыяльнай сеткі.

Таксама вядома пра планы стартапа Perplexity AI аб’яднацца з TikTok, пры гэтым у новай кампаніі будуць мець долю і іншыя буйныя інвестары, а ByteDance будзе адхіленая ад поўнага кантролю над сацсеткай. Іншы буйны прэтэндэнт на платформу — Oracle, якая цяпер аказвае серверную падтрымку.

TikTok быў ненадоўга заблакаваны ў ЗША ў студзені згодна з законам, які патрабуе ад ягонага кітайскага ўладальніка ByteDance альбо прадаць яго з меркаванняў нацыянальнай бяспекі, альбо сутыкнуцца з забаронай. Трамп пасля ўступлення на пасаду 20 студзеня падпісаў указ пра затрымку выканання закона на 75 дзён.

У 2020 годзе Microsoft і Oracle прэтэндавалі на набыццё праграмы, якая належыць ByteDance, калі Трамп упершыню аказаў ціск на сацыяльную сетку, каб яна адмовілася ад свайго кітайскага валодання або сутыкнулася з забаронай. Microsoft была сярод галоўных прэтэндэнтаў, але перамовы неўзабаве сарваліся.

Спроба Трампа прадаць TikTok скончылася праз некалькі месяцаў, калі ён пакінуў сваю пасаду. Генеральны дырэктар Microsoft, Сацья Надэла, назваў гэтую ўгоду «самай дзіўнай рэччу, над якой я хоць калі працаваў». Паводле ягоных слоў, ва ўрада ЗША быў «асаблівы набор патрабаванняў, а потым ён проста знік».