Цукерберг хацеў выдаліць сяброў ва ўсіх карыстальнікаў Facebook

У дакументах, прадстаўленых Федэральнай гандлёвай камісіяй (FTC) ЗША, утрымліваюцца электронныя лісты кіраўнікоў Meta за красавік 2022 года. У іх супрацоўнікі кампаніі прызнаюць, што культурнае значэнне Facebook сярод карыстальнікаў зніжаецца.

Кіраўнік Meta Марк Цукерберг выказаў занепакоенасць тым, што, нягледзячы на стабільную ўцягнутасць, зніжэнне папулярнасці сацсеткі можа стаць сур’ёзнай праблемай для кампаніі ў будучыні, нават пры поспеху Instagram і WhatsApp.

На думку Цукерберга, структура і фармат раздзелу «Сябры» ў сацсетцы састарэлі: усе канкурэнты Facebook ужо выкарыстоўваюць раздзел «Падпісчыкі». Таксама ён адзначыў, што ў многіх карыстальнікаў спісы сяброў сталі неактуальнымі, а запыт на дабаўленне ў сябры ўспрымаецца як больш «цяжкавагавае» дзеянне ў параўнанні з простай падпіскай.

Цукерберг прапаноўваў цалкам адмовіцца ад раздзелу «Сябры» і перайсці на мадэль з падпісчыкамі нават для прыватных акаўнтаў. Таксама прапаноўвалася ідэя поўнай «зачысткі» ўсіх спісаў сяброў з прапановай карыстальнікам пачаць запаўняць акаўнт нанова. З-за боязі страты аўдыторыі меркавалася пратэставаць змены ў адной з краін.

На думку кіраўніка Meta, для вырашэння сітуацыі патрэбныя экстрэмальныя меры, а не нязначныя, «касметычныя» паляпшэнні Facebook, якія не прывядуць да жаданага выніку.