Цукерберг: ШІ-боты заменяць нам сяброў і псіхатэрапеўтаў

У інтэрв’ю падкастэру Дваркешу Пателю Цукерберг спаслаўся на даследаванне Pew Research 2023 года, згодна з якім 40% амерыканцаў маюць трох або менш сяброў, а 8% не маюць іх увогуле. «Сярэднестатыстычны чалавек хоча мець да 15 сяброў, але рэальнасць такая, што людзям не хапае сувязяў, і яны часта адчуваюць сябе самотнымі», — адзначыў ён. Паводле меркавання бізнесмена, ШІ, убудаваны ў Facebook, Instagram, WhatsApp і разумныя акуляры Ray-Ban, можа запоўніць гэты прабел.

«ШІ не заменіць жывых зносін, але стане падтрымкай для тых, у каго недастаткова сацыяльных кантактаў», — падкрэсліў Цукерберг. Ён таксама бачыць у ШІ патэнцыял для ментальнага здароўя, называючы яго «даступным тэрапеўтам» для абмеркавання любых жыццёвых праблем. На канферэнцыі Stripe бізнесмен параўнаў ШІ-асістэнтаў з алгарытмамі стужак Instagram і TikTok, якія вывучаюць перавагі карыстальнікаў і падладжваюцца пад іх.

Аднак эксперты выказваюць заклапочанасць з нагоды такой замены жывых зносін. Прафесар Каралеўскага каледжа Лондана Тыл Уілкс у інтэрв’ю The Guardian адзначыла, што сучасныя боты на ШІ не здольныя забяспечыць неабходную тонкасць у псіхалагічнай дапамозе і могуць прапаноўваць недарэчныя парады.

Канфідэнцыйнасць даных — яшчэ адна праблема. Уры Галь, прафесар Сіднэйскага ўніверсітэта, адзначыў, што карыстальнікі схільныя дзяліцца з ШІ асабістай інфармацыяй гэтак жа, як з людзьмі, што робіць такія даныя «залатой жылкай» для Meta, улічваючы яе гісторыю, у тым ліку скандал з Cambridge Analytica.