Цукерберг: ВНУ не рыхтуюць людзей да рэалій рынку працы

Цукерберг разважаў пра сувязі, якія наладзіў падчас навучання ў Гарвардзе (менавіта тут ён пазнаёміўся са сваёй жонкай), і пра тое, што добрага наогул даў яму ўніверсітэт.

Пры гэтым ён сцвярджае, што на сённяшнім рынку працы «корачка» ўжо не з’яўляецца неабходнасцю для працаўладкавання. «Сумняваюся, што каледж рыхтуе людзей да тых прафесій, якія ім патрэбны сёння. Я думаю, гэта вялікая праблема, і праблема студэнцкай запазычанасці таксама значная», — сказаў Цукерберг.

Ён патлумачыў, што навучанне ў ВНУ вельмі дорага каштуе, і многія выпускаюцца з велізарнымі даўгамі па крэдытах. Але дыплом не дае ніякай гарантыі працаўладкавання.

«Адна справа, калі б каледж быў проста нейкім сацыяльным досведам, і вы б пачыналі з нуля. Але тое, што каледж не рыхтуе вас да патрэбнай вам прафесіі, а вы пачынаеце з вялізнай фінансавай ямы, — гэта дрэнна», — працягнуў мільярдэр.

Па яго словах, рана ці позна людзі задумаюцца, у чым сэнс. «Гэта свайго роду табу — казаць, што, магчыма, не ўсім патрэбна ісці ў каледж. Але паколькі для многіх прафесій гэта не патрабуецца, людзі пачнуць прыходзіць да такой высновы трошкі часцей, чым нейкіх 10 гадоў таму», — адзначыў Цукерберг.

Кошт аднаго навучальнага года ў амерыканскіх ВНУ можа вагацца ад $40+ тысяч у год да $90+ тысяч — у найбольш прэстыжных установах.

Між тым Цукерберг падкрэслівае, што з пункту гледжання пошуку кантактаў і наладжвання адносін з іншымі людзьмі ВНУ бясцэнныя: «Пытанне ў тым, якая частка каледжа пра вучобу, а якая — пра тое, каб пасталець, перш чым выйсці ў свет. … [Ва ўніверсітэце] я сустрэў шмат людзей, якія згулялі важную ролю ў маім жыцці». Для Цукерберга гэта жонка, сябры, з якімі ён дагэтуль мае цесныя стасункі, і сузаснавальнікі яго кампаніі. Бізнесмен кажа, што для яго гэта значыць больш, чым любы з прадметаў.