Twitter павіншаваў супрацоўніцу з 10-годдзем працы ў кампаніі — яе скарацілі за колькі дзён да гэтага

Элейн Філадэльфа займала пасаду старэйшага менеджара па даследаваннях у спажывецкім падраздзяленні Twitter. Паводле яе слоў, у мінулую пятніцу сацсетка развіталася цалкам з усёй яе камандай.

А ў нядзелю Філадэльфа атрымала віншавальную паштоўку з зычэннем далейшых поспехаў і сувенір у гонар 10 гадоў супрацоўніцтва з кампаніяй.

На мінулым тыдні ў спробе скараціць выдаткі Twitter звольніў каля паловы свайго глабальнага штату. Некаторыя аддзелы ліквідаваліся цалкам, у некаторых з 80-100 чалавек заставалася толькі некалькі. Пазней выявілася, што частку людзей пазбавілі працоўных месцаў памылкова — іх прасілі вярнуцца.