Twitter перастаў аплачваць арэнду офісаў і хоча не плаціць абяцаных выходных дапамог
Ілан Маск адчайна спрабуе скараціць выдаткі Twitter: як высветліў New York Times, сацсетка перастала аплачваць арэнду офісных памяшканняў, у тым ліку штаб-кватэры ў Сан-Францыска. Акрамя таго, Twitter адмовіўся заплаціць $200 тысяч адной авіякампаніі за прыватныя рэйсы, здзейсненыя ў кастрычніку — яна ўжо падала ў суд.
Прычым у некаторых выпадках Маск сам дае ўказанне не плаціць пастаўшчыкам розных паслуг для Twitter. А супрацоўнікі пазбягаюць іх тэлефанаванняў.
У мінулым месяцы дзеля аптымізацыі выдаткаў Twitter скараціў каля паловы свайго 7,5-тысячнага штату. Тады звольненым супрацоўнікам у ЗША паабяцалі кампенсацыю за тры месяцы. Паводле інфармацыі NYT, цяпер кіраўніцтва разглядае варыянт наогул не выплачваць дапамогі — і рызыкуе атрымаць пазовы ад былых працаўнікоў.
Яшчэ адным спосабам здабыць грошай стаў продаж канцылярскіх прылад Twitter на аўкцыёне.
NYT піша, што Маск імкнецца зэканоміць для кампаніі як мага больш сродкаў напярэдадні шматлікіх разбораў. Так, Twitter пагражае расследаванне Федэральнай гандлёвай камісіі і калектыўны пазоў ад былых супрацоўнікаў. На дапамогу юрыстам Twitter былі закліканыя іх калегі са SpaceX, яшчэ адной кампаніі, якую ён узначальвае.
Таксама Twitter мусіць выплаціць каля $1 млрд гадавых працэнтаў па крэдытах, якія былі ўзятыя бізнэсоўцам для куплі кампаніі і цяпер ляглі на яе плечы. Угода складала $44 млрд, Маск пазычыў у банкаў $13 млрд. Паводле паведамлення Reuters, некаторыя збіраюцца спісаць гэтыя пазыкі ў страты.
Читать на dev.by