Алеся Чапкевич bel 12 жніўня 2026, 16:51

У Беларусі стартаваў праект па лічбавізацыі перасоўнага гандлю

Жыхарам вёсак цяпер будуць папросту рассылаць пуш-апавяшчэнні аб тым, калі да іх прыедзе аўталаўка.

Як піша ў сябе ў тэлеграме Міністэрства сувязі і інфарматызацыі, праект па цыфравізацыі гандлю на сяле пачалі рэалізоўваць у Гродзенскай вобласці.

Сервіс, які пакуль знаходзіцца ў распрацоўцы, аўтаматызуе інфармаванне сельскіх жыхароў пра працу аўталавак. Карыстальнікам будуць прыходзіць апавяшчэнні пра планаваны час прыбыцця аўталаўкі, магчымых затрымках, новых маршрутах і змяненні расклада руху. Новы функцыянал дапоўніць экасістэму сервісаў платформы «Разумны горад (рэгіён)».

Праект накіраваны на выкананне патрабаванняў Аляксандра Лукашэнкі якасна і бесперабойна абслугоўваць вяскоўцаў. Яго зацвердзіла Мінсувязі.

Адзначаецца, што дзяржаве новая ініцыятыва дазволіць кантраляваць выкананне сацыяльных стандартаў у рэжыме рэальнага часу, аб’ектыўна ацэньваць эфектыўнасць працы суб’ектаў гандлю на сяле і ахапіць усе аддаленыя населеныя пункты. Бізнес жа зможа аўтаматычна выбудоўваць і аптымізаваць лагістычныя маршруты, а таксама скараціць прастой і халасты прабег тэхнікі.

Новы сервіс стане даступны насельніцтву Гродзенскай вобласці да канца 2027 года. Пазней яго пашыраць на ўсю краіну.