У ChatGPT з'явіўся свой Wrapped з вашымі вынікамі года

Функцыя даступная для карыстальнікаў з бясплатнай падпіскай, а таксама тарыфаў Plus і Pro, пры ўмове што ў іх уключаныя опцыі захаванай памяці і гісторыі чатаў і дасягнуты мінімальны парог актыўнасці за год. Карпаратыўныя акаўнты — Team, Enterprise і Education — у аглядзе не ўдзельнічаюць. У кампаніі падкрэсліваюць, што фармат зроблены «лёгкім, арыентаваным на прыватнасць і цалкам кантралюецца карыстальнікам».

Your Year with ChatGPT збірае персанальны вынік года на аснове тэм, запытаў і сцэнарыяў выкарыстання чат-бота. Карыстальнікі атрымліваюць візуальную справаздачу з графікай, «узнагародамі» і архетыпамі, якія адлюстроўваюць стыль узаемадзеяння з ШІ. Напрыклад, ChatGPT можа прысвоіць званне накшталт «Creative Debugger» за актыўную працу з ідэямі, кодам ці рашэннем складаных задач. Таксама сэрвіс генеруе ілюстрацыю і паэму, заснаваныя на ключавых інтарэсах карыстальніка.

Агляд не адкрываецца аўтаматычна: яго можна запусціць уручную праз галоўны экран праграмы або проста запытаўшы ў чат-бота «Your Year with ChatGPT». Функцыя працуе як у вэб-версіі, так і ў мабільных аплікацыях на iOS і Android.