Алеся Чапкевич world 6 сакавіка 2026, 13:55

ШІ разагнаў попыт на цэнтральныя працэсары

ШІ дасць магутны буст попыту на CPU Intel і AMD. Пра гэта прадстаўнікі кампаній заявілі на канферэнцыі Morgan Stanley Technology, Media & Telecom 2026, піша Tom’s Hardware.

Пакінуць каментарый

ШІ разагнаў попыт на цэнтральныя працэсары

ШІ дасць магутны буст попыту на CPU Intel і AMD. Пра гэта прадстаўнікі кампаній заявілі на канферэнцыі Morgan Stanley Technology, Media & Telecom 2026, піша Tom’s Hardware.

Фіндырэктар Intel Дэвід Зінснер сказаў, што «CPU ў гэтым годзе зноў сталі „крутымі“»: ШІ-агентам патрэбны працэсары, каб каардынаваць вылічэнні, якія затым выконваюць GPU і NPU. Па яго словах, некаторыя кліенты ўжо абмяркоўваюць доўгатэрміновыя кантракты на пастаўкі працэсараў, каб забяспечыць сабе патрэбныя аб’ёмы для пашырэння інфраструктуры.

Кіраўнік AMD Ліза Су пацвердзіла трэнд: кампанія бачыць моцны рост попыту на CPU, звязаны з павелічэннем нагрузак на інферэнс. Яна дадала, што попыт у працэсарным накірунку «значна перасягнуў чаканні».

Бум ШІ ужо некалькі гадоў выклікае дэфіцыт кампанентаў. Спачатку гэта былі GPU, калі пасля запуску ChatGPT у 2022-м дата-цэнтры пачалі масава закупляць відэакарты для навучання мадэляў. Да сярэдзіны 2025 года сітуацыя з GPU пачала стабілізавацца, але ўзніклі новыя «вузкія месцы» — памяць і назапашвальнікі, якія таксама вельмі патрэбны ШІ-цэнтрам апрацоўкі дадзеных.

З-за гэтага ў канцы 2025 года цэны на RAM і SSD пачалі расці і працягвалі павялічвацца мінімум да лютага 2026-га. Гэты недахоп патэнцыйна больш сур’ёзны за крызіс GPU, таму што памяць і сховішчы выкарыстоўваюцца амаль ва ўсіх прыладах — ад смартфонаў і тэлевізараў да аўтамабіляў і прамысловай тэхнікі.

Рост агентнага ШІ узмацняе нагрузку на ЦАД: цяпер патрабуецца шматпрацэсарная архітэктура, дзе разам працуюць CPU, GPU, NPU і іншыя паскаральнікі. У некаторых рэгіёнах, напрыклад у Кітаі, ужо фіксуецца дэфіцыт серверных CPU. Калі попыт працягне расці, частка ціску можа з часам перакінуцца і на спажывецкі рынак.

Пры гэтым для AMD і Intel спажывецкі сегмент усё яшчэ вельмі важны — прыкладна палова іх квартальнай выручкі па-ранейшаму прыходзіць ад звычайных ПК і кліенцкіх прылад. Таму рост попыту з боку дата-цэнтраў не павінен цалкам выцесніць гэты рынак, хаця можа паменшыць даступную прапанову. Некаторыя аналітыкі папярэджваюць, што калі дэфіцыт кампанентаў будзе ўзмацняцца, гэта можа прывесці да знікнення самых танных ПК ужо да 2028 года.