У польскім Агенцтве інвестыцый і гандлю ператрусы праз праграму PBH

Прадстаўнік PAIH Марцін Грачык, каментуючы інфармацыю пра ператрус, паведаміў, што «агенцтва праяўляе адкрытасць, гатоўнасць да супрацоўніцтва і дае дакументы».

Праграма PBH была заснаваная ў верасні 2020 года з мэтай прыцягнення ў Польшчу ІТ-спецыялістаў і кампаній з Беларусі, а затым распаўсюдзілася на такія краіны, як Грузія, Расія, Украіна, Малдова і Арменія.

На фоне перадвыбарнай кампаніі ў Польшчы пры канцы лета 2023 года разгарэўся візавы скандал. Польскія медыя пісалі пра ўдзел у ім МЗС краіны і кампаніі VFS Global, праз сайт якой праходзіла рэгістрацыя слотаў на польскія візы. Перш за ўсё аферы шукалі ў краінах Афрыкі і Блізкага Усходу, але Беларусь таксама замяшаная.

26 студзеня гэтага года Польшча перастала выдаваць беларусам візы РВН. На думку МЗС Польшчы, візы па праграме «Poland. Business Harbour» часта выкарыстоўваліся «для мэт, несумяшчальных з яе прызначэннем». Улады лічаць, што ў рамках РВН «абсалютна бескантрольна былі ўвезеныя ад 50 да 90 тысяч замежнікаў».

Спецыяльна створаная камісія па расследаванні візавага скандалу збіраецца да красавіка расследаваць «злоўжыванні, халатнасць і хібы» пры легалізацыі знаходжання замежнікаў у Польшчы, і нават вылічыць нелегалаў.