Навукоўцы знайшлі ген, які дазваляе спаць усяго 3 гадзіны на суткі

Звычайна чалавеку патрэбна каля васьмі гадзін сну, каб арганізм змог аднавіцца і нармальна функцыянаваць. Але ёсць людзі, якія спяць усяго 3–6 гадзін у дзень і пры гэтым цудоўна сябе адчуваюць. Такіх людзей называюць «кароткаспячымі». Навукоўцы з Каліфарнійскага ўніверсітэта ў Сан-Францыска вывучылі іх ДНК і выявілі мутацыю ў гене SIK3, які дапамагае кіраваць унутраным гадзіннікам арганізму — цыркадным рытмам.

Даследаванне пачалося, калі да нейрабіёлага Ін-Хуэй Фу звярнуліся людзі, што спяць менш за шэсць гадзін. Навукоўцы прааналізавалі геном адной сям’і і знайшлі рэдкую мутацыю. Пазней яны даведаліся пра сотні іншых кароткаспячых і выявілі некалькі мутацый у розных генах, уключаючы SIK3.

Каб праверыць, як гэтая мутацыя ўплывае на сон, навукоўцы правялі эксперымент на мышах. Яны ўвялі мутацыю ў ген SIK3 некаторым грызунам і параўналі іх са звычайнымі. Высветлілася, што мышы з мутацыяй спалі ў сярэднім на 30 хвілін менш. Таксама навукоўцы заўважылі, што мозг гэтых мышэй працаваў больш актыўна, асабліва ў вобласці сінапсаў — месцах, дзе нервовыя клеткі перадаюць сігналы.

Навукоўцы мяркуюць, што гэтая мутацыя дапамагае мозгу хутчэй аднаўляцца, таму людзям з ёй трэба менш сну. Яны спадзяюцца, што далейшыя даследаванні дапамогуць лепш зразумець, як працуе сон, і знайсці новыя спосабы лячэння бессані і іншых парушэнняў сну.