Звольнілі — выдаліў усю перапіску. У Мінску завялі крымінальную справу за помсту працадаўцу

Пракуратура Фрунзенскага раёна Мінска ўзбудзіла крымінальную справу ў дачыненні да экс-супрацоўніка адной з арганізацый "па факце мадыфікацыі камп'ютарнай інфармацыі, якая пацягнула прычыненне істотнай шкоды".

Як паведамляе прэс-служба, мужчыну звольнілі. Ён раззлаваўся — зайшоў у карпаратыўную электронную пошту і змяніў параметры ўліковага запісу, а таксама выдаліў усе электронныя лісты, у тым ліку службовую перапіску. Гэта "пацягнула страту значнага аб'ёму інфармацыі, неабходнай для вытворчай і гаспадарчай дзейнасці арганізацыі".

Карэспандэнцыя была выдалена без магчымасці аднаўлення — "што парушыла правы і законныя інтарэсы юрыдычнай асобы".

Дзеянні кваліфікаваны па артыкуле 350 КК РБ. Мінімальнае пакаранне па гэтым артыкуле — штраф або пазбаўленне права займацца пэўнай дзейнасцю, але таксама да чалавека можа быць прыменена абмежаванне або пазбаўленне волі на тэрмін да трох гадоў.