«Аддаленая праца зло». Які фармат працы айцішнікі лічаць найбольш прыдатным?

Меркаванні (умоўна) за офіс

— Я нарадзіўся ў 1983-м, не заўсёды быў айцішнікам і хадзіў на працу як на працу (у аўдыторыі да студэнтаў, і гэта было крута, жывыя стасункі). У маім узросце і з жаданнем падтрымліваць форму паездкі ў офіс — самае тое (правы прынцыпова не атрымліваю, жыву за горадам, дабіраюся да офіса электрацыяй, не ў Варшаву)!

Для другой працы я б шукаў аддаленую працу і, калі б атрымаў такую, пайшоў бы ў каворкінг, каб не напружваць офіс асноўнага працадаўцы і мець магчымасць спакойна працаваць з другім.

Асабіста для мяне аддаленая праца зло. Мне спатрэбіцца вельмі шмат часу, каб прывесці сябе ў стан поўнай прадуктыўнасці побач з лядоўняй і канапай. Я размяжоўваю працоўную і асабістую прастору. Праца з офіса традыцыйна дапамагае ў гэтым на ўсе 100%.

— Ідэальны варыянт — невялікі офіс з неабавязковым наведваннем. Захацелася ў офіс — пайшоў у офіс. Не захацелася — адпаведна, не пайшоў.

— Я пачынаў кар’еру ў 2021-м, працаваў на фул рэмоўт. Было вельмі сумна, бо <у такіх умовах> ні каманды не бачыш, нічога. Калі нават і хадзіў у офіс, то каманду ўсё роўна не бачыў, бо працаваў у аўтсорсах. Адпрацаваў так больш за тры гады.

Калі ты толькі пачынаеш і нікога не бачыш, гэта рэальна генацыд. У мяне не было каму дапамагчы, хто бы паглядзеў у кампутар і сказаў «ты робіш нейкую хрэнь».

Так, былі калегі на сазвонах, але гэта так сабе дапамагала. Плюс праект быў складаны, «легасёвы».

Цяпер працую ў прадукце на гібрыдзе — таксама на складаным legacy-праекце, дзе таксама вельмі шмат усялякіх сістэм, модуляў. Але цяпер я знаходжуся ў камандзе і, калі што, заўжды магу да кагосьці павярнуцца і спытаць. Гэта моцна спрашчае і паскарае працэс у шмат разоў.

Сумесныя абеды — класна, прыкольна, у мяне ніколі такога не было. Нават з’явіўся свой лакальны менеджар (да гэтага быў з Амерыкі), таксама класны хлопец, паляк. І вось мы сядзім у такім вялікім коле, можам схадзіць разам на абед, пабалбатаць, і гэта стварае больш прыемную атмасферу — што вы не проста прыходзіце на працу патыкаць у клавішы.

— Мне здаецца, супраць офісаў выступаюць бяздзетныя. Ну, ці мужчыны, якія не займаюцца дзецьмі. Калі ў цябе дома двухгадовы прапелер, які пастаянна мамкае, то ты ў офіс не тое што паедзеш, пабяжыш. Гэта цудоўнае месца, каб адпачыць ад хатніх спраў, выдыхнуць і перазагрузіцца.

За гібрыд

— Прыхільнік гібрыду, але без прымусу. Бываюць дні, калі хочацца папрацаваць дома з ложка і нікуды не ехаць. Але ўвесь час сядзець дома даволі складана. Выдумляць сабе праз дзень, куды б выйсці — таксама такое сабе.

Галоўнае, каб не гналі ў офіс як на раллю. Ды і офісы бываюць розныя. Адна справа, калі гэта прасторныя пакоі на 5-7 чалавек, а іншае — калі опенспейс на 50 пысаў, дзе ад шуму ўвечары хочацца схавацца ў пакоі з поўным шумападаўленнем.

За аддаленую працу (ну, па большай частцы)

— Офіс гэта:

• кожны дзень марнаваць час на памыцца / прыбрацца;
• бла-бла-бла навакольных;
• гадзіна туды / назад і знайсці месца для паркоўкі;
• зручнае крэсла і стол са зменнай вышынёй? Ага, як жа. Ікееўскі дэшманскі зэдлік і стол;
• вельмі прыемны і чысты туалет.

— Дужа люблю офіс і ўсіх тых, хто за яго. На пачатку кар’еры я больш за ўсё любіў падымацца у 5:30, каб паспець на электрацыю ў 6:23, потым на метро да офіса да 9:00. Сканчваеш у 18:00, але ўсім пофіг на твой расклад, таму прапускаеш электрацыю на 18:15, а наступная ў 19:34.

Прыязджаеш дадому, а 22:00 — задаволены, зараджаны стасункамі з дзівоснымі калегамі (якія на аддаленай працы немагчымыя), опенспейсам і ненапружанасцю па жыцці. Павячэраў і спаць. Сям’я, жыццё, хобі — я вас прашу, на выходных часу хапае. Ну толькі калі он-кол не прызначаць.

Год у такім рэжыме і ніякі гібрыд ці, не дай бог, аддаленую працу не захочаш. Плюсы відавочныя.

— Прапаную тым, хто патрабуе працы ў офісе, уключыць у працоўны час увесь той час і ўсе дапаможныя выдаткі, якія затрачваюцца на транспарціроўку да офіса і назад. Думаю, хутка супакояцца. Хочаце, каб людзі працавалі ў офісе, плаціце тады працэнтаў на 25-35 вышэй, каб апраўдаць 1-1,5 гадзіны туды і столькі ж назад, якія вы б выкралі з майго асабістага часу.

— Офіс у «айці» лухта поўная, асабліва калі гаворым пра аўтсорс галеры, дзе супрацоўнікі, нават калі яны ў офісе, усё роўна, па сутнасці, на аддаленай працы для замоўцы.

Асноўныя барацьбіты за офіс, як мне здаецца, гэта ўсемагчымыя менеджары, бо пры пераходзе на аддаленую працу аказваецца, што яны ўсе не патрэбныя і бенефітаў працэсу распрацоўкі не прыносяць.

Аргументы за «ментарства» і «размовы ля кулера» са свайго асабістага досведу офіснай працы лічу лухтой чыстай вады. Ніхто не стаіць за спінай у трэйні і не тыкае пальцам у яго памылкі, а размовы ля кулера вельмі рэдка вядуцца пра працу. Мы, памятаю, абмяркоўвалі што заўгодна, толькі не працу. З апошніх дэбатаў «ля кулера», памятаю, было абмеркаванне, ці вартая якасць здымкаў айфона ягонаму кошту.

На практыцы праца ў офісе ўяўляе сабой шчыльна нацягнутыя навушнікі з музыкай, каб не перашкаджалі працаваць.

— Зусім не хачу ў офіс. Раздражняе марнаваць 2 гадзіны ў дзень на дарогу з дому да офіса. Яшчэ гэта і грошаў каштуе. А так, дома я спакойна пайшоў на кухню, паеў танна і хутка. А ў офісе трэба кудысьці ісці, плаціць за кавярню, дастаўкі таксама не бюджэт. Таксама зборы перад паходам у офіс: дома я ўстаў, узяў ноўтбук у трусах і ўжо на працы.

Ну і воркэйшэн будзе немагчымы, а я кайфую ад працы на новым месцы. Калі дома я магу размазваць сваю працу, то на новым месцы фігачу, каб як мага хутчэй зрабіць працу і пайсці гуляць. Увогуле, для мяне зараз пайсці ў офіс будзе пакутай.

— Хаджу на працу раз у месяц. Гэта траўмуе. Суцэльнае гаду-гаду, цесна, горача. Калі быў нармальны офіс, хадзіў, але пастаянныя скарачэнні плошчы офіса ў мэтах cost saving / CO2 saving да дабра не давядуць.

— Мне падаецца, офіс добра, калі маеш намер засябравацца з кіраўніцтвам, мэнэджмэнтам і стаць для іх сваім. Хадзіць разам на каву ці папаліць. Паразмаўляць за жыццё. Калі ты збіраешся проста рабіць работу, то аддаленая праца супер.

— Ад сябе скажу, залежыць ад дысцыпліны чалавека. Мая прадуктыўнасць амаль падвоілася на аддаленай працы, але вышэй спакуса паленавацца. Тым не менш дома ніхто не адцягвае, і якасць працы вышэй, і можна «падумаць» замест таго, калі ў офісе дзёрнуць і адцягнуць. І на паведамленні калег адказваеш па сваім часе — напрыклад, папрацаваў у рэжыме «не адцягваць», а потым паглядзеў усе паведамленні.

А што паказваюць даследаванні?

Адно з іх у прыватнасці паказвае, што на аддаленай працы людзі эфектыўнейшыя. Хасэ Марыя Барэра з Аўтаномнага тэхналагічнага інстытута Мексікі, Нікалас Блум са Стэнфарда і Стывен Дж. Дэвіс з Школы бізнесу імя Бута (Chicago Booth) у траўні 2020 года пачалі штомесячнае апытанне сярод больш за 30 тыс. работнікаў ва ўзросце ад 20 да 64 гадоў, якія зараблялі не менш за $20 тысяч у год у 2019 годзе.

У ходзе аналізу дадзеных, сабраных да сакавіка 2021 года, даследчыкі высветлілі, што амаль шэсць з дзесяці работнікаў паведамілі пра большую прадуктыўнасць пры працы з дому, чым яны чакалі. Тады як толькі 14% заявілі, што сталі працаваць менш. У сярэднім прадуктыўнасць рэспандэнтаў пры аддаленай працы аказалася на 7% вышэй, чым яны меркавалі.

40% работнікаў адзначылі, што падчас пандэміі яны былі больш прадуктыўнымі дома, чым у офісе, і толькі 15% сказалі адваротнае.

Прычым, згодна з тым жа даследаваннем, прадуктыўнасць узрасла перш за ўсё за кошт адсутнасці паездак у офіс і палепшанага якасці сну (згодна з даследаваннем, праведзеным яшчэ да кавіду, на аддаленай працы людзі прачынаюцца ў сярэднім на 30 хвілін пазней).

Таксама сярэдняя працягласць працоўнага часу ў людзей на аддаленай працы склала каля 32 гадзін у тыдзень у параўнанні з 36 гадзінамі да пандэміі, хоць працоўны час выйшаў за рамкі традыцыйных офісных гадзін. Аднак гэта не значыць, што яны сталі выконваць сваю працу горш.

Але іншае даследаванне не такое аптымістычнае. Майкл Гібс з той жа Чыкагскай школы бізнесу (Booth), а таксама Фрыдэрыке Менгель і Крыстаф Зімрот з Эсэкскага ўніверсітэта выявілі супярэчлівыя дадзеныя ў ходзе даследавання 10 тысяч высокакваліфікаваных работнікаў у буйной азіяцкай кампаніі, якая надае ІТ-паслугі.

Рэспандэнты цалкам перайшлі ў сакавіку 2020 года на працу з дому і пачалі вяртацца ў офіс у канцы кастрычніка.

Даследчыкі высветлілі, што агульная колькасць адпрацаваных гадзін за гэты перыяд павялічылася прыкладна на 30%, уключаючы 18-працэнтны рост працы за межамі звычайнага працоўнага часу.

Аднак у той жа час сярэдняя прадуктыўнасць, якая вымяраецца кампаніяй шляхам пастаноўкі працоўных мэтаў і адсочвання прагрэсу ў іх дасягненні, крыху знізілася.

Час, які затрачваецца на каардынацыйныя мерапрыемствы і нарады, таксама павялічыўся, у той час як бесперапынныя працоўныя гадзіны скараціліся.

Акрамя таго, даследчыкі выявілі, што супрацоўнікі марнавалі менш часу на размовы і радзей сустракаліся сам на сам са сваімі кіраўнікамі. Прычым павелічэнне колькасці працоўных гадзін і зніжэнне прадукцыйнасці былі больш значнымі для супрацоўнікаў, у якіх дома былі дзеці.

Калі супаставілі аб’ём выкананай працы з адпрацаванымі гадзінамі, даследчыкі прыйшлі да высновы, што прадуктыўнасць знізілася прыкладна на 20%. У той жа час людзі сталі працаваць даўжэй, чым у офісе, недзе на траціну гадзіны.

Аднак, адзначае Стывен Дж. Дэвіс з Школы бізнесу імя Бута, акцэнт на прадукцыйнасці айцішнікаў не ўлічвае такія пытанні, як маральны дух і ўтрыманне персаналу. Усё ж кампаніі, якія больш гнутка падыходзяць да арганізацыі працоўнага часу, маюць больш шанцаў прыцягнуць лепшыя кадры па лепшым кошце.

Удалёнка или офис? Большинство хочет всего по чуть-чуть

Па тэме

Удалёнка или офис? Большинство хочет всего по чуть-чуть