Прылады Xiaomi масава перасталі працаваць у Беларусі і Расіі
Учора ўвечары карыстальнікі з Беларусі і Расіі сталі масава скардзіцца на недаступнасць сэрвісаў кітайскай кампаніі Xiaomi, якія адказваюць за кіраванне прыладамі разумнага дома — разнастайнымі датчыкамі, лямпамі, робатамі-пыласосамі, камерамі відэаназірання і іншай інтэлектуальнай тэхнікай. Самі прылады таксама не могуць падключыцца да сервераў Xiaomi, і праз гэта адмаўляюцца працаваць.
Аб масавым характары праблемы сведчыць сэрвіс маніторынгу збояў DownRadar і шматлікія водгукі карыстальнікаў на афіцыйнай старонцы расійскага прадстаўніцтва кампаніі «УКантакце». Спецыялісты Xiaomi ў курсе непаладак і займаюцца рашэннем праблемы. «Стараемся максімальна аператыўна выправіць, чакайце, калі ласка», — гаворыцца ў заяве прадстаўнікоў Xiaomi ў Расіі.
Як піша 3DNews, складанасці з доступам да сэрвісаў разумнага дома Xiaomi паўсталі каля 21:00 па мінскім часе 4 кастрычніка. У расійскіх і беларускіх карыстальнікаў з Мінска, Масквы, Санкт-Пецярбурга і іншых гарадоў перастала працаваць праграма Mi Home, знікла магчымасць аўтарызавацца на сайце account.xiaomi.com, і праз гэта яны цалкам страцілі доступ да абсталявання, якое ўваходзіць у экасістэму разумнага дома. Запусціць прылады не атрымліваецца нават уручную: робаты-пыласосы адмаўляюцца пыласосіць, разумныя лямпачкі не ўключаюцца, немагчыма паглядзець, што цяпер «бачаць» камеры назірання. Праблемы паўсталі як у прылад, набытых у Расіі, так і ў заказаных з-за мяжы.
Прычыны інцыдэнту не ясныя. Некаторыя расійскія карыстальнікі мяркуюць, што яны могуць быць звязаныя з дзейнасцю Раскамнагляда, які рэгулюе бяспеку інтэрнэту на тэрыторыі Расіі. Паводле інфармацыі Telegram-канала Mash, праблема ў збоі на серверах Xiaomi. Мяркуючы з паведамленняў карыстальнікаў «УКантакце» і форума 4PDA, раніцай 5 кастрычніка непаладкі захоўваюцца.
Читать на dev.by