Алеся Чапкевич bel 11 лютага 2026, 16:56

У чатах распавядаюць, як на беларускай мяжы бяруць адбіткі пальцаў

Нядаўна стала вядома, што беларусы, якія жывуць за мяжой, павінны будуць здаваць адбіткі пальцаў. Telegram-канал Dzik Pik паглядзеў у прымежных чатах, як складваецца сітуацыя зараз.

Пакінуць каментарый

У чатах распавядаюць, як на беларускай мяжы бяруць адбіткі пальцаў

Нядаўна стала вядома, што беларусы, якія жывуць за мяжой, павінны будуць здаваць адбіткі пальцаў. Telegram-канал Dzik Pik паглядзеў у прымежных чатах, як складваецца сітуацыя зараз.

Падарожнікі адзначаюць, што ў цэлым працэдура праходжання мяжы не змянілася. Асобна згадалі біяметрычныя пашпарты.

«На мінулым тыдні ўсё было як звычайна, толькі пачалі браць адбіткі пальцаў беларусы, і ўсё».
«Гэта звычайная праверка зараз. У беларусаў без іншага грамадзянства таксама часам правяраюць. У кожным выпадку — у мяне адзін раз правяралі».
«І ў беларусаў бяруць. А калі з біяметрычным пашпартам, то ўжо гады як бяруць на ўездзе».
«Няправільны тэрмін „бяруць“, бо на мяжы проста звяраюць адбіткі з чыпа ў пашпарце і/або базы дадзеных. Звяраюць неяк рандомна, як мне падалося, бо з біяметрычным пашпартам ужо некалькі гадоў езджу, але скануюць не кожны раз».
«Бяруць адбіткі ва ўсіх, незалежна — біяметрыя ці стары пашпарт».
«На ўездзе і выездзе з РБ указальны палец абедзвюх рук сканіруюць ва ўсіх дарослых без выключэння».
«Абедзвюх рук, магчыма, толькі калі пашпарт без чыпа. З біяметрычным толькі адзін указальны».
«У мяне біяметрычны пашпарт, у гэтым годзе пачалі абодва пальцы пастаянна сканіраваць. Да НГ — рандомна, часам адзін сканіравалі, часам наогул не».

Нядаўна Аляксандр Лукашэнка падпісаў змены ў заканадаўства па пытаннях дактыласкапіі. Па новым законе, адбіткі бяруць у асоб 14-75 гадоў, якія, сярод іншага:

атрымалі замежнае грамадзянства, ВНЖ ці іншы дакумент іншай краіны, і афіцыйна паведамілі пра гэта Беларусі. Або пастаянна жывуць за межамі Беларусі і знаходзяцца на консульскім уліку;
падлягаюць дэпартацыі, высылцы з Беларусі або перадачы замежнай дзяржаве па дамовах аб рэадмісіі;
уключаны ў спіс асоб, чый уезд у Беларусь забаронены або непажаданы.

Акрамя таго, адбіткі бяруць у асоб, у дачыненні да якіх органамі пагранічнай службы «прынята рашэнне аб правядзенні дактыласкапічнай рэгістрацыі ў інтарэсах нацыянальнай бяспекі». Dzik Pik мяркуе, згаданую вышэй праверку праводзяць менавіта на гэтай падставе.