Беларуса ў Польшчы клічуць на адбіткі пальцаў на радзіме. Гэта новыя правілы? Ужо?

Як распавёў devby чытач, які пражывае ў Польшчы, на днях па беларускім адрасе ён атрымаў апавяшчэнне, у якім яму прапануюць з’явіцца ў РУУС «для праходжання дактыласкапічнай рэгістрацыі».

У апавяшчэнні не гаворыцца аб прычынах такой цікавасці да яго, але ёсць спасылка на закон РБ № 236-3 ад 4 лістапада 2003 года «Аб дзяржаўнай дактыласкапічнай рэгістрацыі». Для візіту дадзены тэрмін у паўтара тыдня, у выпадку няяўкі, папярэджваюць беларуса, яго могуць прывесці прымусова. 

«Гэта якраз тое, аб чым нядаўна пісалі — зняцце адбіткаў у тых, хто з’ехаў, ці да мяне нейкія прэтэнзіі?» — задаецца пытаннем чытач.  

Нагадаем, аб планах уладаў пашырыць спіс тых, хто падлягае дактыласкапіі, стала вядома ў ліпені. А ў верасні быў апублікаваны праект зменаў у закон «Аб дзяржаўнай дактыласкапічнай рэгістрацыі». Згодна з ім, адбіткі пальцаў будуць браць у грамадзян Беларусі ад 14 да 75 гадоў, якія атрымалі:

— грамадзянства іншай краіны;

— ВНЖ іншай краіны;

— «іншы дакумент замежнай дзяржавы, які прадастаўляе права на льготы і іншыя перавагі ў сувязі з палітычнымі, рэлігійнымі поглядамі або нацыянальнай прыналежнасцю» (пад гэта апісанне падыходзіць «карта паляка»).

Агульная ўмова для гэтых катэгорый грамадзян — яны праінфармавалі аб атрыманні дакументаў «органы ўнутраных спраў альбо дыпламатычныя прадстаўніцтвы ці консульскія ўстановы Рэспублікі Беларусь ва ўстаноўленым парадку».

Акрамя таго, дактыласкапію абяцаюць беларусам, якія аформілі выезд на ПМЖ за межамі Беларусі і сталі на консульскі ўлік.

Менавіта пад апошнюю катэгорыю і падпадае наш чытач — ён аформіў ПМЖ, стаў на консульскі ўлік і жыве ў Польшчы. Аднак жа папраўкі ў закон яшчэ не прынятыя, на сайце МУС вісіць бягучая версія закона — ці можа міліцыя працаваць на апярэджанне?

У актуальнай версіі закона, праўда, ёсць такі пункт: абавязковай дактыласкапіі падлягаюць «грамадзяне Рэспублікі Беларусь, замежныя грамадзяне і асобы без грамадзянства, падазраваныя (абвінавачаныя) у здзяйсненні злачынства альбо асуджаныя за здзяйсненне злачынства». Але наш чытач нічога аб крымінальным пераследзе ў адносінах да сябе не ведае, да апошняга часу ён прыязджаў у Беларусь (цяпер кажа, што пасцеражэцца). Да таго ж выезд на ПМЖ заўсёды ўзгадняецца з праваахоўнымі органамі. Гэта значыць найбольш верагоднай прычынай выкліку ўяўляецца ўсё ж афармленне дазволу на ПМЖ і консульскі ўлік.

Але ў гэтым выпадку не вельмі зразумела, як чалавек, які афіцыйна з’ехаў на ПМЖ у іншую краіну, павінен з’явіцца ў РУУС? Праект закона на гэты конт кажа цьмяна: «у тым ліку пры выдачы (абмене) дакументаў, якія сведчаць асобу». Гэта не выпадак нашага чытача, ён знаходзіцца за мяжой і за новым пашпартам не звяртаўся. 

Wanted. Калі вы/вашы знаёмыя таксама атрымалі апавяшчэнне аб дактыласкапіі, напішыце нам у @devby_insight_bot, гэта ананімна.