У ChatGPT з’явіўся трэнд на «луксмаксінг»: бот ацэньвае людзей і прапануе ботакс

«Луксмаксінг» — гэта імкненне палепшыць знешнасць праз догляд за скурай, прычоскі, вопратку і фізічную форму. Карані трэнду ідуць у субкультуру інцэлаў — маладых мужчын, няздольных знайсці сексуальнага партнёра, нягледзячы на жаданне гэта зрабіць, у чым яны вінавацяць жанчын. Луксмаксінг уключае такія паняцці, як «mewing» (практыкаванні для сківіцы), «hunter eyes» (форма вачэй), «canthal tilt» (вугал нахілу вачэй) і «mogging» (перавага над канкурэнтамі).

У раздзеле карыстальніцкіх аплікацый ад ChatGPT бот LooksmaxxingGPT увайшоў у топ-10 катэгорыі «Стыль жыцця», набраўшы больш за 700 тысяч дыялогаў. Яго стварыў распрацоўшчык пад псеўданімам «Ant», гэты бот не правяраецца OpenAI. Адказы аплікацыі выклікаюць новыя пытанні: напрыклад, ён назваў аднаго карыстальніка «субчалавекам» і заявіў, што без пластычнай хірургіі ён асуджаны на «ігнараванне і адмовы» з боку жанчын, а «вострая сківіца перамагае ўбор за $3000 у 100 выпадках са 100».

Журналістка Business Insider Кэці Натапулас пратэставала LooksmaxxingGPT, загрузіўшы два сэлфі: адно «непрывабнае» (без макіяжу, з бруднымі валасамі і дзіўнай усмешкай) і другое з яскравай памадай і нейтральнай усмешкай. У першым выпадку бот прысвоіў ёй рэйтынг «Mid-Tier Becky» (5 з 10 па шкале прывабнасці бота — ад «субчалавека» да «эфірнага ўзроўню»). У другім — «High-Tier Becky». Запыт пра падабенства да знакамітасцяў даў параўнанне з Лізай Эдэльштэйн з серыяла «Доктар Хаўс».

Бот прапанаваў парады па макіяжы, падаўшы табліцу з прадуктамі з мас-маркету і агульнымі рэкамендацыямі. Запыт пра «хардмаксінг» (пластычная хірургія або стаматалогія) прывёў да чаканай парады паспрабаваць ботакс для жанчыны пасля 40. Каб праверыць дакладнасць бота, аўтар загрузіў фота актора Ўолтана Гогінса, вядомага па серыяле «Белы лотас». Бот ацаніў актора на 3,5/10, аднёсшы да «зоны нармальнасці-субнармальнасці».