У індыйскім тэхнахабе рэзка зменшылася колькасць жадаючых атрымаць візу H-1B

У Хайдарабадзе знаходзяцца офісы многіх амерыканскіх тэхналагічных гігантаў, уключаючы Microsoft, Google, Amazon, Facebook і Oracle. На гэты горад прыпадае значная частка ІТ-экспарту Індыі. Тут таксама базуецца шмат айцішнікаў, якія прэтэндуюць на амерыканскія працоўныя візы накшталт H-1B. Але сёлета эксперты адзначаюць рэзкае падзенне попыту на гэтую візу, што адлюстроўвае асцярогі спецыялістаў — некаторыя агенцтвы больш чым за 2,5 месяца не атрымалі ніводнага звароту з нагоды H-1B.

Змена настрояў звязана з забаронай падаваць заяўкі некалькі разоў ад розных працадаўцаў —  гэта павялічвала шанцы выйграць у латарэі. Многіх таксама адштурхнула павелічэнне выдаткаў, якія не гарантуюць атрыманне візы. Напрыклад, збор пры падачы заяўкі павялічыўся з $10 да $215. Айцішнік з 10-гадовым досведам распавёў выданню, што летась выдаткаваў на ўсю працэдуру каля $6 тысяч, але атрымаў адмоўны адказ. Ён хацеў паспрабаваць зноў сёлета, але агенты таксама паднялі цэны на свае паслугі — на 50%.

ЗША выдаюць фіксаваную колькасць візаў H-1B — 65 тысяч у год, прычым квот па краінах няма. Паводле слоў кансультантаў, з якімі размаўляла выданне, у 2024 годзе было пададзена каля 1,5 мільёна заявак, з якіх унікальнымі былі толькі 600–700 тысяч. Ахвота падаваць заяўкі на H-1B у гэтым годзе знікла нават у амерыканскіх працадаўцаў: калі раней яны былі гатовы хадайнічаць за людзей з 2–3 гадамі досведу, то цяпер не. Летась некаторым выдавалі візы ўсяго на паўгода, і для кампаній гэта вельмі нязручна, бо ў такім выпадку трэба амаль адразу падавацца наноў — заявы на падаўжэнне разглядаюцца па 4–6 месяцаў.