ІТ-кампаніі ў Беларусі актыўна наймаюць у 2025. Праўда, звальняюць таксама

Паводле звестак афіцыйнай статыстыкі, у сакавіку кампаніі сектара прынялі на працу больш за 1,6 тыс. спецыялістаў — на 45% больш, чым у сакавіку мінулага года (тады было нанята 1,1 тыс.).

Але ўражвае не толькі гэта. Белстат больш за два гады не фіксаваў такіх высокіх лічбаў найму ў ІТ і сувязі за адзін месяц. Апошні раз больш за 1,6 тыс. спецыялістаў кампаніі сектара наймалі ў лютым 2022 года (1,8 тыс.). У мінулым годзе найбольш прадуктыўнымі па колькасці найма былі жнівень і верасень (кампаніі нанялі больш за 1,5 тыс. чалавек).

Усяго за студзень–сакавік кампаніі «інфармацыі і сувязі» нанялі амаль 4,4 тыс. новых спецыялістаў — на 34% больш, чым у першым квартале мінулага года.

У гэтым годзе тон задаюць асобныя расійскія кампаніі (Lesta, Aston) і кампаніі з беларускімі каранямі.

Напрыклад, кампанія Innowise Group за апошні месяц размясціла на rabota.by амаль 70 вакансій. Каля 20 прапаноў працаўладкавання ў Беларусі размешчана на сайтах кампаній EPAM і Awem Games, каля 15 — у кампаніі LeverX.

Верагодна, адна з прычын рэкорднага найму ў сакавіку — пераразмеркаванне спецыялістаў унутры сектара. То бок, калі супрацоўнікі сыходзяць (іх звальняюць) з адных кампаній і ўладкоўваюцца ў іншыя. Якраз у сакавіку ў «інфармацыі і сувязі» таксама прыкметна вырасла колькасць звольненых супрацоўнікаў. За месяц кампаніі звольнілі больш за 1,5 тыс. спецыялістаў — на 10% больш, чым у сакавіку мінулага года, і на чвэрць больш, чым у лютым гэтага года. Апошні раз кампаніі звальнялі больш за 1,5 тыс. чалавек даволі даўно — у жніўні 2023 года.

Колькі звольненых (ці тых, хто сышоў сам) спецыялістаў уладкаваліся ў сакавіку ў новыя ІТ-кампаніі — невядома.

Усяго з пачатку года (за студзень—сакавік) у ІТ і сувязі было звольнена амаль 4 тыс. чалавек. За такі ж перыяд мінулага года лічба была ніжэй — 3,4 тыс. чалавек.