У Нацбанку рэкламуюць беларусам крыптабанкі

Ягораў прывёў прыклады правальных крыптавалютных біржаў і стартапаў, але падкрэсліў, што ў Беларусі ўсё будзе інакш.

«Крыптавалюты сёння гэта не проста радкі кода ў камп’ютары, гэта гіганцкі рынак. Яго агульная вартасць у піковыя моманты перавышала $3 трлн. Каб вы разумелі маштаб: гэта больш, чым каштуюць усе найбуйнейшыя кампаніі некаторых еўрапейскіх краін разам узятыя», — адзначыў ён. Зразумелей ад такога параўнання не стала, але Ягораў запэўніў, што «маштаб настолькі вялікі», што нават у ЗША прымаюцца законы аб тэхналагічным лідарстве і падтрымцы талентаў.

Па яго словах, краіны змагаюцца за розумы і капіталы ў сферы паслуг. Той, хто сёння не створыць зразумелыя правілы, заўтра апынецца на ўзбочыне прагрэсу.

«Часта ў прыклад ставяць Швейцарыю, і яе банк Sygnum — гэта сапраўды перадавая ўстанова. Але важна разумець прынцыповую розніцу: у Швейцарыі або ў ЗША крыптабанкі — гэта прыватныя ініцыятывы асобных банкаў, якія змаглі дамовіцца з рэгулятарам. У Беларусі ж ствараецца не проста банк, а цэлая, паўнавартасная дзяржаўная сістэма. Указ № 19 — гэта не дазвол для адной кампаніі, гэта архітэктура ўсёй фінансавай галіны будучыні», — растлумачыў чыноўнік.

Лукашэнка падпісаў указ аб крыптабанках і токенах

Па тэме

Лукашэнка падпісаў указ аб крыптабанках і токенах

Ён адзначыў, што крыптабанкі могуць прадастаўляць розныя фінансавыя паслугі, і назваў тры.

«Першае — крэдыт пад залог крыпты. Уявіце сітуацыю: у вас ёсць біткоін, які расце ў цане. Вам патрэбны грошы на рамонт ці пакупку тэхнікі, але прадаваць актыў зараз нявыгадна. У крыптабанк вы перадаеце манеты ў якасці залогу. Банк выдае вам звычайныя рублі, вы карыстаецеся грашыма, гасіце крэдыт, і банк вяртае вам вашу крыпту. Вы вырашылі свае задачы, захаваўшы інвестыцыі», — сказаў Ягораў. Пра ваганні курсу ён не згадаў.

Крыптазіма блізка: біткойн абваліўся, інвестары не разумеюць чаму

Па тэме

Крыптазіма блізка: біткойн абваліўся, інвестары не разумеюць чаму

«Другое — «стэйкінг», або так званыя дэпазіты новага пакалення. Гэта сучасны аналаг банкаўскага ўкладу. Вы размяшчаеце свае лічбавыя актывы на рахунку банка для забеспячэння працы глабальных блокчэйн-сетак. За гэта банк налічвае вам узнагароджанне. Гэта празрысты, абсалютна легальны спосаб атрымліваць пасіўны даход са сваіх назапашванняў пад абаронай дзяржаўнага рэгулятара.

І трэцяе — крыптакарта. Самая доўгачаканая і зразумелая паслуга. Гэта звычайная банкаўская карта, прывязаная да вашага рахунку ў крыптабанку. Вы прыходзіце ў звычайны магазін, плаціце за прадукты. У момант аплаты банк імгненна канвертуе частку вашай крыпты ў беларускія рублі па бягучым курсе. Вы жывяце ў лічбавым свеце, не адчуваючы ніякіх тэхнічных складанасцяў», — сказаў Ягораў.

Чыноўнік таксама нагадаў аб «адной фундаментальнай інавацыі, якая датычыцца соцень тысяч людзей». Па ўказе аб крыптабанках, які ўступіць у сілу летам, самазанятыя змогуць атрымліваць аплату за сваю працу ў крыпце.

«Раней, калі дызайнер або праграміст выконваў заказ для замежнага кліента і той прапаноўваў аплату ў крыпце, чалавек апынаўся ў шэрай зоне. Ён не мог легальна залічыць гэтыя грошы на рахунак, не мог афіцыйна заплаціць з іх падаткі. Цяпер гэтая перашкода знятая. Галоўная адзіная ўмова — такія аперацыі павінны праходзіць праз інфраструктуру крыптабанка. Гэта не проста зручнасць, гэта рэвалюцыя на рынку працы», — адзначыў намеснік старшыні праўлення Нацбанка.

Кажа, дзяржава блаславіла самазанятых працаваць з кім заўгодна па ўсім свеце і выкарыстоўваць самыя сучасныя тэхналогіі разлікаў. «Проста рабіце гэта праз ліцэнзаваны банк. Гэта дае людзям магчымасць сумленна пацвярджаць свае даходы, будаваць крэдытную гісторыю і адчуваць сябе абароненым», — сказаў ён.

ПВТ чакае перазагрузка, а Беларусь — крыптабанкі

Па тэме

ПВТ чакае перазагрузка, а Беларусь — крыптабанкі