Плацяжы па QR-кодзе стануць даступныя кліентам усіх банкаў Беларусі з 1 снежня 2026 года. Гэтую дату назваў старшыня праўлення Нацбанка Раман Галаўчанка ў інтэрв’ю часопісу «Банкаўскі веснік».
Плацяжы па QR-кодзе стануць даступныя кліентам усіх банкаў Беларусі з 1 снежня 2026 года. Гэтую дату назваў старшыня праўлення Нацбанка Раман Галаўчанка ў інтэрв’ю часопісу «Банкаўскі веснік».
Па яго словах, развіццё нацыянальнай плацежнай сістэмы, яе тэхналагічная незалежнасць і ўстойлівасць з’яўляюцца прыярытэтам для рэгулятара. Там хочуць, каб плацежная інфраструктура Беларусі адпавядала самым сучасным патрабаванням, была зручнай і надзейнай у любой сітуацыі.
«Ключавы праект у гэтай сферы — сэрвіс „КРОК“ (ажыццяўленне плацяжоў па QR-кодзе). Гэта не проста чарговы плацежны сэрвіс, а паўнавартасная суверэнная альтэрнатыва міжнародным плацежным сістэмам, пабудаваная выключна сіламі айчынных спецыялістаў на нацыянальнай плацежнай інфраструктуры», — сказаў Раман Галаўчэнка.
Ён дадаў, што была праведзена мадэрнізацыя сістэмы імгненных плацяжоў, распрацаваны і ўкаранёны ў АРІП увесь неабходны софт. Чыноўнік падкрэсліў, што «усё — ад архітэктуры да канчатковага кода — створана ў Беларусі».
Тэставыя плацяжы з удзелам некаторых банкаў былі праведзены ў снежні. Галаўчанка кажа, што сістэма працуе стабільна, і ўжо перайшлі ад пілота да фазы маштабавання. «З 1 ліпеня 2026 года да сэрвісу падключацца банкі, што ўваходзяць у групу значнасці I, з 1 снежня 2026-га аплата па QR-кодзе праз „КРОК“ стане даступная кліентам усіх банкаў краіны», — адзначыў кіраўнік рэгулятара.
У далейшым плануецца аб’яднаць разрозненыя плацежныя QR-сэрвісы ў адзіную бясшоўную экасістэму, дзе плацеж праходзіць імгненна і бяспечна незалежна ад таго, праз які банк ці аплікацыю ён выконваецца. Будуць дадаваць новыя сцэнары аплаты, нарошчваць функцыянал і пашыраць магчымасці для бізнесу. «Ключавы прынцып застанецца нязменным: усе рашэнні, што ствараюцца, працуюць на нашай уласнай інфраструктуры і нацыянальных распрацоўках», — падкрэсліў Галаўчэнка.
Рэлацыраваліся? Цяпер вы можаце каментаваць без верыфікацыі акаўнта.