У Польшчы перагледзяць правілы выдачы карты паляка

Міністр адказваў на запыт дэпутата Сейма ад кансерватыўнай кааліцыі «Канфедэрацыя» Пшэмыслава Віплера ў X. Ён заклікаў улады разабрацца, каму і на якіх падставах выдаецца дакумент.

Паводле словаў дэпутата, карта паляка задумвалася для падтрымкі людзей, якія апынуліся за межамі Польшчы пасля Другой сусветнай вайны. Але цяпер яе ўсё часцей выкарыстоўваюць для хуткага атрымання грамадзянства, сацыяльных дапамог і бясплатнай адукацыі людзі, якіх мала што звязвае з Польшчай, заявіў Віплер. І дадаў, што ў інтэрнэце ёсць цэлыя гайды, рэйтынгі консульстваў і падробленыя дакументы, якія нібыта спрашчаюць атрыманне карты.

Ён запатрабаваў высветліць, ці кантралюе дзяржава гэты працэс і ці мае інструменты для спынення злоўжыванняў. «Карта паляка павінна была служыць пацвярджэннем сувязі з Польшчай, а не пропускам у сацыяльную сістэму», — напісаў дэпутат.

Сікорскі адказаў, што праблема сапраўды ёсць і ўрад ужо ўзяўся за яе. «Праблема рэальная, і таму мы ўжо працуем над унясеннем паправак у закон. Мы ліквідуем успадкаваныя паталогіі ў міграцыйнай палітыцы», — адзначыў міністр і паабяцаў Віплеру падрабязны адказ у пісьмовым выглядзе.