У ПВТ абмеркавалі, як развіваць стартап-рух ва ўніверсітэтах (кажуць, трэба менавіта там)

Кіраўнік назіральнага савета ПВТ Ганна Рабова заявіла, што важна развіваць у моладзі прадпрымальніцкае мысленне і што ўрад гэты курс ухваляе. «Неабходна прыкласці максімальныя інтэлектуальныя і рэсурсныя намаганні, каб забяспечыць умовы для рэалізацыі здольнасцяў і ідэй нашай моладзі. Каб праз пэўны час мы з задавальненнем віталі ў Парку высокіх тэхналогій новыя кампаніі, якія нарадзіліся дзякуючы агульным намаганням», — заявіла яна.

Першы намеснік міністра адукацыі Аляксандр Бахановіч падкрэсліў, што стартап-рух ва ўніверсітэтах звязаны з рэалізацыяй найважнейшых дзяржаўных задач, а для пабудовы інавацыйнай эканомікі і дыверсіфікацыі экспарту пастаянна патрэбны новыя ідэі, якія трэба хутка камерцыялізаваць. «Менавіта ўніверсітэты з’яўляюцца той экасістэмай, дзе нараджаюцца інавацыі», — дадаў ён. Сказаў, што ВНУ актыўна фарміруюць у студэнтаў прадпрымальніцкія кампетэнцыі і інавацыйнае мысленне.

Як патлумачылі ў ПВТ, ва ўніверсітэтах генеруюцца і правяраюцца гіпотэзы, а веды сустракаюцца з прадпрымальніцкім падыходам і пляцоўкамі, дзе іх можна прымяніць на справе. Таму інвестуючы ў стартап-інфраструктуру ў ВНУ, ПВТ і Мінадукацыі «закладваюць фундамент для ўстойлівага росту нацыянальнай стартап-экасістэмы».

На мерапрыемстве абмяркоўвалі крытэрыі для адбору ранніх стартап-праектаў і эфектыўнае інфармацыйнае суправаджэнне ў ВНУ, а таксама дакументы для запуску акселерацыйных праграм на базе ўніверсітэтаў.

Таксама адбылася дыскусія акадэміі з удзелам бізнесу, экспертаў і іншых партнёраў. Абмяркоўвалі, як усім узаемадзейнічаць у межах нацыянальнай стартап-экасістэмы. Далей будуць укараняць пэўныя «адпрацаваныя інструменты» ў 12 ВНУ-партнёрах і маштабаваць паспяховы досвед. І папярэдзілі, што шлях будзе доўгім.